Romssa ja Finnmárkku fylkkadoavttir, Anne Grethe Olsen, vuorjašuvvá go dearvvašvuođabargiid gaskkas leat oallugat geat eai leat váldán influeansaboahkuid dán čavčča.
Dán jagi influeansaboahkuhanlogut leat mealgat vuollelis nationála ávžžuhusaid ja dan ektui maid eará jagiid leat leamašan.
Fylkkadoavttir ávžžuha suohkaniid garrasit movttiidahttit suohkana bargiid, ja earenoamážit dearvvašvuođabargiid, váldit influeansaboahkuid.
– Lea vurdojuvvon ahte boahtá stuorát influeansabárru dálvái go dat mii maŋemus jagiid lea leamašan. Dasa lassin lea vuordimis ahte koronadávda maid ain njoammu servvodagas oktanaga eará vuoiŋŋahatvulššiiguin, čállá Romssa ja Finnmárkku Stáhtahálddašeaddji iežaset neahttasiiddus.
Unnán sadjásaš bargit
Muhtun suohkanat leat dál juo dieđihišgoahtán ahte sis lea ollu oanehisjávkan vuoiŋŋahatvuolšši geažil, sihke mánáidgárddiin, skuvllain ja dearvvašvuođasuorggis. Dat dagaha kapasitehtahástalusaid dearvvašvuođasuorgái go eai leat doarvái sadjásaš bargit.
– Jus oallugat válddáše influensaboahkuid, de dat sáhtášii váikkuhit buozalmasvuođajávkamii positiivvalaččat, unnidit njoammuma dearvvašvuođainstitušuvnnain ja unnidit dárbbu sadjásaš bargiide, čállá Stáhtahálddašeaddji.
