-Almmuhus-
OĐĐASATFylkkadiggi lea dohkkehan boahtte jagi bušeahta

Fylkkadiggi lea dohkkehan boahtte jagi bušeahta

-

-

Finnmárkku fylkkadiggi lea dohkkehan 2017 bušeahta, ja ekonomiijaplána 2020 rádjai. Stuorimus oassi bušeahttarámmas geavahuvvo johtolahkii ja joatkkaskuvllaide.

Fylkkagieldda ollislaš bušeahtta jahkái 2017 lea badjelaš guokte miljárdda ruvnnu, lassin bohtet vel investeremat, mat 2017:s dahket badjelaš 250 miljovnna ruvnnu, čállá fylkkasuohkan preassadieđáhussastis.

Fylkkalávdegotti bušeahtta- ja ekonomiijaplánaárvalus dohkkehuvvui, smávit rievdadusaiguin, nu go doarjja Njearjeveaji geaidnohuksemii, lassidoarjja museaide ja Foldal-guovddážii.

 

Fylkkadikki vuoruheamit

MS Hornøy doaibma bissu seamma dásis go dál.

Deanu bátnedivššohaga ja Davvenjárgga joatkkaskuvlla investeremat galget čađahuvvot 2017:s ja Iččát káijainvesteremat maŋiduvvojit jahkái 2018.

Fylkkaráđđeolmmái galgá guorahallat vejolašvuođaid sirdit feargadoaimmaid Ákŋoluovttas stáhtii.

 

Bušeahta váldooasit

Eanaš oassi Finnmárkku fylkkagieldda bušeahttarámmas geavahuvvo johtolahkii ja joatkkaskuvllaide.

Dat guokte fágasuorggi geavahit sullii 80 proseantta fylkkagieldda bušeahtas.

Boahtte jagi bušeahtas vuoruhuvvojit maid fágaoahpahus ja riikkaidgaskasaš doaimmat.

– Bušeahtta sisttisdoallá maid 7,3 miljovdna kruvdna lassiruđaid fylkkageainnuid divodan- ja ođasmahttindoaimmaide. Fylkkagieldda rámmadoarjja lassánii seamma ollu stáhtabušeahtas, ja dan geažil dat lea vejolaš, čállá fylkasuohkan.

 

Stuora investeremat

Finnmárkku fylkkagielddas leat leamaš hui stuora investerengolut maŋimuš jagiid, ja sihke geaidnu Idjavuonduoddara badjel ja Álttá joatkkaskuvlla divodeamid ja ođđavisti huksemat leat leamaš gáibideaddji prošeavttat.

Maiddái 2017:s, go dalle joatkit Álttá joatkkaskuvlla huksendoaimmaid, prošeakta mii máksá sullii 400 miljovdna kruvdna.

-Almmuhus-