Sydvaranger Gruve koŋkáneapmi fuolastahttá fylkasátnejođiheaddji Runar Sjåstada. – Dás leat stuorra váikkuhusat dan birrasiid 400 bargái, sin bearrašiidda ja buohkaide earáide geaidda dát guoská, lohká son. NAV Finnmárku gal lea jo ráhkkanan dása.
Sydvaranger Gruve koŋkáneapmi fuolastahttá fylkasátnejođiheaddji Runar Sjåstada. – Dás leat stuorra váikkuhusat dan birrasiid 400 bargái, sin bearrašiidda ja buohkaide earáide geaidda dát guoská, lohká son. NAV Finnmárku gal lea jo ráhkkanan dása.
Odne iđđes dat Sydvaranger Gruve ruvkefitnodaga stivra dieđihii ahte eai oainne eará čovdosa go diktit fitnodaga koŋkánit. Ággan lei go ruovdemálmmas man rogget Guovžajávrris, lea haddi njiedjan, ja eará ruhtadančovdosat eai doaibman.
Birrasiid 400 bargi
Fitnodagas barget birrasiid 400 olbmo.
– Dat mearkkaša ahte koŋkáneapmi boahtá dovdot. Eai dušše Mátta-Várjjagis, muhto maiddái viidábut Finnmárkkus, leat olbmot ja fitnodagat maidda dát čuohcá, dadjá fuolastuvvon fylkasátnejođiheaddji preassadieđáhusa bokte.
– Iežan bealis áiggun veahkehit gokko sáhtán, muhto ferten mieđihit dili leat váttisin. Finnmárkku fylkkagieldda lea maid čuovvolanovddasvástádus daid olu oahpahalliid ovddas geat barget fitnodagas. Mii fertet geahččalit hahkat dieđuid das makkár váikkuhusat koŋkáneamis leat. Mun áiggun čilget fylkkalávdegoddái čoahkkimis boahtte maŋŋebárgga, dadjá Sjåstad.
Nuppástuhttin
Mátta-Várjjaga gieldda lea ruvkedoaibma leamaš okta váldofitnodagain 1900 logu álggu rájes. Ruvkedoaibma bissehuvvui 1996:s. Mátta-Várjjagis lei garra nuppástuhttináigodat dán maŋŋil. Birrasiid 10 jagi áigi álggahuvvui ruvkedoaibma fas.
– Dákkár vásáhus sáhttá buktit sihke doaivaga ja vejolašvuođaid Mátta-Várjjaga báikkálaš servodahkii, vaikke dát lea váivves diehtu, dadjá fylkasátnejođiheaddji.
NAVas ráhkkanit
NAV Finnmárku lea ásahan doaimmaid maid bokte dustejit dán dili gos olusat masset bargguideaset. Mátta-Várjjaga várás leat NAV Finnmárkkus ja báikkálaš NAV-kantuvrras jo plánat das mo galget veahkehit sin geat dál gártet bargguhisvuhtii, dieđihit sii sierra preassadieđáhusas.
– Mii leat ráhkkanan dasa ahte dákkár dilli sáhttá šaddat. NAV Mátta-Várjjaga bargit čuovvolit sin geaidda koŋkáneapmi guoská, ja mii leat gergosat čohkket resurssaid miehtá fylkka veahkehan dihte báikkálaš NAV-kantuvrra, dadjá NAV Finnmárkku direktevra Nina Haugen.
Mo veahkehit?
Sydvaranger Gruve fitnodaga bargit geaidda koŋkáneapmi guoská, gohččojuvvojit diehtojuohkinčoahkkimiidda. Vuosttaš čoahkkimat dollojit jo bearjadaga.
– Mii veahkehat sin registrerehit bargoohccin, ja juohkit dieđuid das mo galget ohcat beaiveruđaid. Lea dehálaš ahte ohcagohtet ođđa bargguid nu jođánit go vejolaš. Danne mii hállat maid singuin bargomárkana vejolašvuođaid birra. Sin gelbbolašvuhtii lea dárbu eará sajiin riikkas. Dasa lassin gávdnojit Finnmárkkus maiddái rabas virggit eará ealáhusain mat soitet sidjiide heivet, dadjá Haugen.
Maiddái NAV Finnmárku čilge Sydvaranger Gruve fitnodagas leamaš stuorra mearkkašupmi Mátta-Várjjaga bargomárkanis.
Go dál máŋga čuođis masset barggu de dat čuohcá sihke ovttaskas olbmuide, muhto maiddái báikkálaš servodahkii.
– Mátta-Várjjagis lea jahkeviissaid leamaš unnán bargguhisvuohta. Go dál bissehuvvo Sydvarangera doaibma de mii árvvoštallat bargguhisvuođa lassánit sákka báikkálaččat, muhto maiddái fylkkas muđuid. Mii leat vásihan ahte go stuorra industriijafitnodagat heaittihuvvojit, de das leat stuorra váikkuhusat. Danne lea midjiide dehálaš ahte buot buori návccat ovttasbarget eastadit váikkuhusaid, dadjá Haugen NAV Finnmárkku preassadieđáhusa bokte.
