Sámedikki jahkedieđáhus čájeha ahte leat unnán ohcamat lulli-, julev,- bihtán- ja ubmisámegielguovlluin doarjjaortnegii «Doarjja sámi giellaprošeavttaide».
Preassadieđáhusas čállá Sámediggi ahte sámediggeráđđi Mikkel Eskil Mikkelsen (NSR) lea fuolastuvvan go bohtet unnán ohcamat lulli-, julev-, bihtán-, ja ubmisámegielguovlluin, ja háliida eanet ohcamiid.
– Mii eat dieđe siva dasa manne bohtet nu unnán ohcamat, muhto koronapandemiija sáhttá leat okta sivain, dadjá Mikkelsen.
Atná vahágin go šadde šluhttet
Son jáhkká ahte dat maid sáhttá váikkuhan go bihtán- ja ubmisámegiellaseminára ja lulli- ja julevsámi oahpahuskonferánssa, maid Sámediggi diibmá lei plánen lágidit, šluhttejuvvojedje korona dihte.
– Dát livčče leamaš arenat deaivvadit suorggi, gos livččiimet beassan daid aktevrraid ávžžuhit ohcat ruđaid, dadjá Mikkelsen.
Ulbmil doarjjaortnegiin «Doarjja sámi giellaprošeavttaide» lea ahte álbmogis lea vejolašvuohta oahppat ja ovddidit sámegiela. Sáhttá earret eará oažžut doarjaga ráhkadit sámegielapplikašuvnnaid ja spealuid dahje jorgalit dakkáriid sámegillii, doallat sámegielkurssaid rávisolbmuide, sámi báikenamaid čohkket dahje gaskkustit, ráhkadit digitála sátnegirjjiid sámegillii ja sámi gielladoaibmabijuide. Ođđa vuoruheapmi dán jagi dán doarjjaortnegis lea ráhkadit sámegielat digitála arenaid mánáide ja nuoraide, nu go e-valáštallama ja sosiála mediaid oktavuođas.
Áigot bagadallat
Sámediggeráđđi oaivvilda ahte Sámediggi ferte šaddat čeahpibun profileret daid vejolašvuođaid mat leat Sámedikkis.
– Dan dihte mii dál ávžžuhit ja hásttuhit olbmuid ohcat. Jus lea mihkkege eahpečielggas dahje jus leat gažaldagat, de lea beare váldit oktavuođa Sámedikkiin. Mii leat gergosat bagadallat. Mihttu lea ahte aktevrrat mat váldet oktavuođa galget lihkostuvvat iežaset barggus, dadjá Mikkelsen.
Dán jagi leat dán doarjjaortnegis golbma ohcanáigemeari, njukčamánu 1. beaivvi, miessemánu 15. beaivvi ja čakčamánu 1. beaivvi.
