Finnmárkku oahppolihttu ávžžuha fylkka bellodagaid listanjunnošiid fuolahit ahte skuvllain ja mánáidgárddiin leat oahppan olbmot.
Finnmárkku oahppolihttu lea fuolastuvvan go Norgga skuvllain leat olu bargit geain váilu relevánta oahppu.
Norgga oahpahusbargiin váilu oainnat njeallje proseanttas oahppu, čájehit diimmá logut.
Finnmárkkus lei lohku beali badjelis, namalassii gávcci proseantta. Dat mearkkaša ahte Finnmárkku ohppiin ledje juohke guđát skuvladiimmus oahpaheaddjit geain ii leat oahppu.
– Statistihkas eai leat rehkenastán oahpaheddjiid jávkama buozalmasvuođa, virgelobi, čoahkkimiid ja kurssaid geažil. Dat mearkkaša ahte mánáid ja nuoraid oahpahit sadjásaččat, geain ii leat oahppu, vel dávjjit, jáhkkimis beali eanet diimmuid go statistihkka čájeha, dadjá Finnmárkku oahppolihttu fylkkajođiheaddji Kari Lium.
Preassagovva
Hástalit politihkkáriid
Finnmárkkus leat oahpaheaddjit ja mánáidgárdeoahpaheaddjit leamaš váilevaččat máŋgalogi jagi.
Jus fylkka mánáin ja nuorain galgá seamma buorre fálaldat go muđuid Norggas, de ávžžuha Oahppolihttu politihkkáriid ásahit doaibmabijuid.
– Finnmárkku oahppolihttu hástala fylkka bellodagaid listanjunnošiid álggahit doaibmabijuid mat geasuhivčče eambbosiid gazzat oahpaheaddjeoahpu ja ohcat virggiid Finnmárkku skuvllain ja mánáidgárddiin, ávžžuha Lium.
