«Fritt Ords Honnør» Ella Marie Hætta Isaksenii

«Fritt Ord Honnør» geigejuvvo musihkkárii, neavttárii ja aktivistii Ella Marie Hætta Isaksenii  minoritehtagáhttema ja sámi álgoálbmotrivttiid gáhttema ovddas.

Ella Marie Hætta Isaksen lei njunušolmmoš mannan vahkku daid ráfálaš siviila jeagohisvuođademonstrašuvnnain Oslos, Ráđđehusa vuostá váilevaš čuovvoleami geažil iežaset Fovsena bieggaturbiinnaid alimusriekteduomus.

Dáiddár ja aktivista Isaksen lea šaddan nana symbola n ođđa vuoigatvuođarahčamis mainna álgoálbmogat ain rahčet Norggas, 40 jagi maŋŋel Álttá-akšuvnna.

– Dát ráhčan lea álggos čájehuvvon sámi dáidagis ja kultuvrras, ja nu de fuomášuhtton álgoálbmogiid vuoigatvuođaid birra stuoraservodagas, erenoamážit nuoraid gaskkas. Dakko lea Isaksen čužžon guovddážis ovttastahttit kultuvrra, aktivismma ja minoritehtagáhttema ja álgoálbmogiid rivttiid barggu dakkár vugiin mii lea olahan hui oallugiid. Son lea álggahan dehálaš servodatdebáhtaid ja reflekšuvdnaproseassaid, dadjá Stiftelsen Fritt Ord stivrajođiheaddji Grete Brochmann preassadieđáhusas.

Bálkaášupmevuoiti duogáš

Isaksen lea leamaš dovddus musihkkár ja aktivista measta logi jagi. 2016:s. vuittii Sámi Grand Prixa, 2017:s Liet International ja 2018:s NRK Stjernekamp. 2017 rájes lea son leamaš njunnošis ja lávlu synthapopjoavkkus ISÁK, geat leat ožžon sihke nationála ja internationála fuomášumi.

Ella Marie Hætta Isaksen neaktá váldorolla kinoáigeguovdilis filmmas «Ellos Eatnu – La elva leve» (2023) Álttá-ášši birra. Sus lea váldorolla «Rahčan – Ellas opprør» dokumentáras 2022:s, mii addá gova su guhkilmas áŋgiruššamis sámi luondduaktivistan, earret eará Riehpovuona-áššis. 2021:s almmuhii son girjji «Derfor må du vite at jeg er same», iežas dáruiduhttima ja vealaheami rahčamuša birra.

Bálkkašumi geigen

Bálkkašumi oažžu Ella Marie Hætta Isaksen Fritt Ord lanjain Oslos, njukčamánu 30. beaivvi. Fritt Ords Honnøras lea supmi 100 000 ruvnno.