Juoigannásti Jon Henrik Fjällgren geasuhii 400 olbmo Sajosii mannan bearjadaga.
Juoigannásti Jon Henrik Fjällgren geasuhii 400 olbmo Sajosii mannan bearjadaga.
Mannan vahkkoloahpa lágiduvvui Ijahis Idja Anáris, ja bearjadaga váldokonsearttas lei beakkán juoigi Jon Henrik Fjällgren guhte geasuhii 400 olbmo Sajosii. Lágideaddjit ledje dieđihan jo duorastaga ahte visot bileahtat ledje nohkan, nu ledje ollusat geat eai beassan gullat beakkálmasa.
Fjällgren rabai konseartta iežás buoremus albmárohki luđiin «Daniels joik» mas čuožžilit ollu dovddut.
– Lea dehálaš čájehit dovdduid go olmmoš juoigá, ja ovtta gaskka ledjen hui njuorranan. Juoiggadettiin leat mu jurdagat ja dovddut luođis, máhccalan ruovttoluotta áiggis ja nu čuožžilit maid dovddut ja ráhkisvuohta, čilge son.
Ráhkisvuohta ja dovddut
Sajos lei spagga dievva, ja buohkat orro duđavaččat. Muhtumat muitalit iežaset gatnjaliid sihkkon ja njuorasmuvvan go Fjällgren rohttii ovtta nuppi luođi.
Konseartta loahpas čuovvoledje maiddái guldaleaddjit Jonn Henrika go dánsii, nu spežžo ja dánsejedje su fárus.
Jon Henrik muitala iežas hui duđavažžan ja lohká somán deaivvadit gehččiiguin geain lea nu ollu ráhkisvuohta.
– Ledje ollu dovddut ja ráhkisvuohta odne, dadjá son, ii ge lohkan diehtit manne, muhto mátkkoštettiin Anárii muitala dovdduid čuožžilan.
– Láve nu go ollu jođašan, dalle bisánan veaháš smiehttat mii lea geavvan ja mo eallin lea. Go bohten deike, de lei hállu addit visot, ja dalle lávejit ilbmat ollu dovddut, lohká Fjällgren.
GEAHČA VIDEO VUOLLELIS (šállošat heajos kvalitehta ovddas):
Illudan boahtit
Jon Henrik Fjällgren rámida Ijahis Idja guldaleddjiid, ja lohká somán beassat juoigat sápmelaččaide.
– Ledjen illudan boahtit, ja lei hui somá beassat dáppe fitnat, logai son maŋŋá go lei geargan konsearttain. Son iige lohkan hálu vuolgit, muhto ođđa čuojahanbargu lei vuordimin ja danne ii beassan návddašit Anára go moadde diimmu bearjadateahkeda.
