RiddoDuottarMuseaid eaiggátstivra lea mearridan ahte áigot iskat Mari Boine mánnávuođaruovttu.
Sámiid Vuorká-Dávviriid eaiggátstivra dat lea gieskat jearran sáhttet go RDM fágalaččat árvvoštallat mo Boine mánnávuođaruovttu sáhtašii vurkkodit ja geavahit RDM museadoibmii.
– Mii leat mearridan ahte áigut dan dahkat, ja áigut fitnat geahččamin dálu, dadjá RiddoDuottarMuseaid (RDM) doaibmi direktevra Berit Åse Johnsen.
Ikte dat lei ge RDM eaiggátstivrras čoahkkin gos mearridedje ahte áigot iskat makkár dilis Mari Boine mánnávuođaruoktu lea.
Vuosttaš geardde jerron
Golggotmánus 2013 čálii Ávvir ahte Mari Boine mánnávuođaruoktu Gámehisnjárggas Kárášjogas, galggai boldot buollinčáskadanhárjehallamis. Dát boaldin bissehuvvui, ja son guhte dál oamasta dán eananbihttá ja dálu, Stig Harby, fálai dalle skeŋket dálu Sámiid Vuorká-Dávviriidda (SVD). Vuossárgga muitalii SVD-eaiggátstivrra jođiheaddji Hjalmar Strømeng ahte leat bivdán veahki RDM:s dán áššis.
– Mii leat vuosttaš geardde ožžon jearaldaga dán áššis dál, mis ii leat ovdal leamaš mihkkege dahkamušaid dáinna dáluin. Muhto lea lunddolaš ahte SVD jearrá mis árvvoštallama go mis lea fágalaš máhttu, dadjá Johnsen.
Jođáneamos lági mielde
RDM dat doaimmaha museadoaimmaid earret eará Kárášjogas, SVD ges oamasta museagálvvuid. Árvvoštallama áigu RDM čađahit nu jođánit go vejolaš.
– Mii áigut gulaskuddat opmodatstivrrain (SVD:in) ahte man jođánit háliidit árvvoštallama dahkkot, muhto álgoiskamiid gal sáhttit hui jođánit dahkat. Eat dieđe vuos šaddat go eanet fágačehpiid váldit áššái, dalle jurddašan erenoamážit vurkkodeami hárrái, čilge Johnsen, almmutkeahttá čielga áigerámma dán bargui.
Mari Boine mánnávuođaruoktu ceaggá Gámehisnjárggas, Kárášjogas ja eatnama oamasta Stig Harby guhte lea fállan skeŋket dálu SVD:ii 2013. Vuossárgga logai son Ávvirii ahte lea ain vuordimin gullat maid SVD mearrida áššis. Dalle logai SVD Hjalmar Strømeng ahte vurdet gullat mo RDM árvvoštallet ášši.
