Fiskes juhkančáhci mas leat sáddot, dan leat kárášjohkalaččat vásihan muhtin sajiin maŋimuš áiggi, go luitet čázi. Nils Asllat Kildedam, čáhcehoavda teknihkalašossodagas Kárášjogas čilge manin.
Kárášjoga čáhcehoavda teknihkalašossodagas, čilge ahte dát ii leat mihkkege mas dárbbaša vuorjašuvvat.
– Dat lea dakkár njivli mii luovvana čáhcebohccis mii lea guhkit áigge vuollái čoagganan bohcciid sisa ja dat ii leat baika, čilge Nils Asllat Kildedam.
Ii miehtá márkana
Dát ii vásihuvvo eará go muhtimiin márkanis.
– Ii leat gal miehtá márkana, dat lea gokko de luovvana. Mannan vahkku lei Bieskángeainnus, ja dan ovdal lei Rávdojogas, muitala Kildedam.
– Dat ii daga maidige juhkat dan čázi, eai leat makkárge váralaš bakteriijat. Dat lea dego sáttu. Ii leat gal dábálaš, muhto ii leat makkárge várálašvuohta, čilge Kildedam.
Ii geava dávjá
Nils Asllat Kildedam čilge viidáseappot ahte dát ii leat mihkkige mii dáhpáhuvva dávjá.
– Dát ii dáhpáhuva nu dávjá, dušše muhtin jagiid luovvana. Go mii gokčat daid revrriid dahje ventiillaid, dalle sáhttet nordašuvvat muhtin čáhcerevrret ja veahá lihkastit, de luovvana čáhcebohcci siste dat njivli, loahpaha Nils Asllat Kildedam.
