-Almmuhus-
-Almmuhus-
OĐĐASAT Fiskes dássi addá viehka dábálaš skuvlaálgima: – Eanaš skuvllain leat gáržžidan man...

Fiskes dássi addá viehka dábálaš skuvlaálgima: – Eanaš skuvllain leat gáržžidan man gallásiid sáhttá mielde váldit

-

-

Eanaš ohppiin šaddá dábálaš skuvlaárgabeaivi. Muhto 6-jahkásaččaide šaddá earálágan skuvlaálgu.

– Lea dábálaš ahte váhnemat, dahje vel ádját ja áhkut ge, leat mielde vuosttaš skuvlabeaivvi, muhto lea stuorra vejolašvuohta ahte nu ii šatta dán jagi. Eanaš skuvllain leat gáržžidan man gallásiid sáhttá mielde váldit, dadjá oahppo- ja integrerenministtar Guri Melby (Gurut) NTB:i.

Dán jagi ii beasa dearvvahit rektora.

– Mun jáhkán eanaš skuvllain leat plánat doallat buori skuvlaálgima, muhto oallugat fertejit leat gerggusin dasa ahte lea earálágan go muđui.

Melby lei vuossárgga Sogndalas rahpamin Fosshagen oahppománáidgárddi ja oahppojagi Høgskulen Vestlánddas. Son galgá maid galledit Sogndal joatkkaskuvlla.

Eai gidde skuvllaid ollislaččat

Preassakonferánssas ovdanbuvttii Melby eanet detáljaid njuolggadusain mat gusket skuvlaálgimii.

Gasku njukčamánu mearridii ráđđehus giddet Norgga skuvllaid hehtten dihte koronavirusa leavvamis. Skuvllat ceahkkálagaid rahppojedje geasi guvlui.

Melby ii jáhke skuvllaid miehtá riikka fas ollislaččat giddejuvvot. Vuosttaš bargu lea doalahit skuvllaid rabas, čilge son.

– Olu mánát ja oahppit galget oažžut sullii seamma mánáidgárde- ja skuvlaárgabeaivvi nu mo ovdal pandemiija, dadjá stáhtaráđđi.

– Fiskes dássi mearkkaša ahte mis leat olles skuvlaluohkát seamma luohkkálanjain vai eai dárbbaš juohkit luohkáid. Dat lea dehálaš vai ožžot ollislaš skuvlabeivviid.

Hástalusat

Seammás buktá koronadilálašvuohta ain hástalusaid.

– Leat olu oahppit geat galget olggos ja sisa skuvlahuksehusain ja mat galget orodit skuvlafeaskáriin. Lea dehálaš ahte skuvllain leat čovdosat dasa, ahte heaittihit friddjaminuhtaid iešguđet áiggiide eaige geavat seamma uskkádagaid, dadjá Melby.

Koronaheiveheapmi lea ahte mánáidskuvlla oahppit galget bissut iežaset luohká searvvis.

Joatkkaskuvllaid ohppiide lea eambbo rabas skuvlarahpan heivehuvvon seaguhusluohkáide. Dat lea árvvoštallon dan mielde ahte boarrásat oahppit nagodit doalahit gaskka go leat skuvllas.

Seamma njuolggadusat gusket olles riikii.

Bohtet ođđa njuolggadusat

Ovdal geasi ásahedje johtalusčuovgavuogádaga skuvllaide, mas leat ruoná, fiskes ja rukses dásit njoammundilálašvuhtii.

Dál leat skuvllat fiskes dásis, ja dán vahkku mielde bohtet ođđa njuolggadusat mo galgá rievdat ruoná dahje rukses dássái.

– Jus njoammun lassána ja mii fertet rukses dássái, de fertet gáržžidit luohkáid ja unnidit ohppiid sirrema. Dat ii mearkkaš ahte fertet giddet, dadjá son.

– Mii leat jo hárjehallan rukses dássái. Mus lea jáhkku ahte mii leat gergosat dasa.

Unnán ruovttuskuvla

Melby vuordá ahte skuvllat dál leat ráhkkanan molssaevttot lanjaide ja buriid plánaid bidjan olgoskuvllaide, nu ahte eanaš ohppiide fállo nu dábálaš skuvla go vejolaš vaikke livččii rukses dássi.

Mannan giđa oahpásmuvve olu oahppit ruovttuoahpahussii ja gulahalle oahpaheddjiiguin ja mielohppiiguin Skype, Zoom, Teams dahje Meet bokte. Muhto čakčat galgá ruovttuoahpahus ráddjejuvvot, oaivvilda Melby.

– Váldonjuolggadus lea skuvlaoahpahus, muhto mas lea vejolaš čađahit ruovttuoahpahusa. Deháleamos bargu mis lea doalahit skuvllaid rabas, dadjá stáhtaráđđi.

©NTB

- Advertisement -
-Almmuhus-