-Almmuhus-
-Almmuhus-
-Almmuhus-
OĐĐASATFiškalii monster-dorski Deanunjálmmis

Fiškalii monster-dorski Deanunjálmmis

-

-

Maŋŋebárgga fiškalii Deanu mearrabivdi Sverre Kimo Pedersen ja su mearrabivdoskibir Knut Arne Eriksen stuorra dorski iežaska sáibmii Deanunjálmmis. Pedersen lohká son ii goassige leat goddán ná stuorra dorski.

– Mun lean bivdán máŋga jagi ja in leat goassige goddán ná stuorra dorski, stuorámusa maid dán rádjái ledjen goddán lei 36 kilosaš ja diibmá godden fas 32 kilosaš dorski. Dat lea hárve goddit dorski mii lea badjel 30 kilo. Lea erenomáš goddit ná stuorra dorski ja erenomážit go in lean goassige oaidnán ná stuorra dorski. Mun jáhkán dát dorski dettii sullii 45 kilo, lohká mearrabivdi Deanovuonas Sverre Kimo Pedersen.
– Lea issoras somá goddit ná stuora dorski. Dábálaččat leat dat stuorámusat sullii 35 kilosaččat, muhto dát dorski lei nu olu stuorát maid mii goassige ovdal leat goddán, lei dego «monster» guolli mii bođii bajáš čiekŋalasas, lohká son.

 

Lihkus lei váiban
Son muitala son ja su mearrabivdoskibir fertiiga váldit atnui vearjjuid maid dábálaččat geavahit báldái.

– Dorski lei čákŋan sáibmii, muhto ii lean nu bures darvánan, nu ahte fertiimet darvvihit dorski guovtti roahkkái, mat leat erenoamážit ráhkaduvvon báldái várás ja dat leat fatnasis jus bálddis dohppe, de sáhttit daiguin roahkastit amaset massit. Dan fertiimet dál dahkat dainna dorskin go lei nu stuoris ja balaimet massit sáimma geasedettiin fatnasii. Lei lihkku ahte dorski lei váiban ja ii bánccardan nu sakka, muđui gal leimme massit dan, čilge Pedersen.

 

Deanunjálmmi «Elvekjerring»

Pedersen muitala ahte lea sullii 100 mehtera čieŋal gos dorski čáŋai sáibmii ja doppe leat dat stuorámus dorskit  Deanuvuonas.

Dorskit mat leat Deanunjálmmis gohčoduvvojit «Elvekjerringer» dahje sámegilliid «johkaáhkut» go leat nu lahka Deanu, muhto ii fal dattetge nu lahka ahte sáivačáhci boahtá njunnái.

– Lea hui čieŋal justa ovdal Deanunjálmmi ja go sii leat dakko, de gohčoduvvo dorski dákko «Elvekjerringer» ja nu leat ge áiggiid badjel dahkan dáppe, muitala Sverre Kimo Pedersen.

 

-Almmuhus-