Lagabui bealli fanasolbmuin eai máhte lohkat mearrakártta.
Gjensidige lea jearahallan fanasolbmuin man bures ipmirdit mearrakárttaid, sihke báberhámis ja digitálalaččat. Oallugat vástidit ahte máhttet geavahit daid, muhto Gjensidige gulahallanhoavda, Arne Voll, vuorjašuvvá go leat ain oallugat geat eai máhte geavahit mearrakártta.
Finnmárkkus vástidii 41 proseantta fanasolbmuin ahte sii rahčet lohkamis mearrakárttaid. 54 proseantta fanasolbmuin ipmirdit mearrakárttaid hui bures dahje bures.
– Guorahallan čájeha ahte lea ollu eahpesihkarvuohta fanasolbmuid gaskkas, dadjá Voll preassadieđáhusas.
Gulahallanhoavda dadjá ahte ii galgga luohttit dušše elektronalaš veahkkeneavvuide nu movt kártaprográmmaide, GPS ja autopilohtai. Son ávžžuha maid váldit mielde báberkártta ja kompássa fatnasii.
