Finnmárkku fylkka várresátnejođiheaddji Ragnhild Vassvik lei mannan vahkkoloahpa Arkangelskas, Ruoššas, digaštallamin Barentsovttasbarggu. Finnmárku váldá badjelasas boahtte Barentsovttasbarggu regionála jođiheami.
Finnmárkku fylkka várresátnejođiheaddji Ragnhild Vassvik deaivvadii Arkhangelska guvernevrrain, Igor Orlovain, lávvardaga digaštallat Barentsovttasbarggu.
Delegašuvnnas geat ledje Arkangelskas leiga maiddái váldogottejođiheaddji Johnny Ingebrigtsen ja fylkkadiggeáirras Remi Strand mielde.
Váldá badjelássii
Finnmárku váldá badjelasas boahtte jagi regionálálaš jođiheami dán ovttasbarggus mii fátmmasta 13 fylkka daid davimus guovlluin Norggas, Ruoŧas, Suomas ja Davvioarje-Ruoššas.
Barentsovttasbargu lea dat áidna regionála olgoriikaneavvu ja lea dehálaš guvlui mas leat dat seamma vejolašvuođat ja hástalusat.
Stuorra bearaš davvin
Igor Orlov čuoččuhii dan dehálašvuođa čájehit Barentsovttasbarggu ja dan mearrideaddji rolla mii das lea, go lea sáhka guovllu ovdáneamis davvin.
Okta ovdamearka máilbmái, stuorra bearaš davvin.
Fylkkavárresátnejođiheaddji čujuhii dan stuorra beroštumi mii lea árktalaš guovlluin ja Barentsovttasbargu dán oktavuođas lea erenomáš go ovddida guovllu beroštumiid.
Dehálaš Pomoragávpi
Deaivvadeapmi dáhpáhuvai dan jahkásaš Pomorafestiválas Margaritinskayas ja dán jagi lea 25 jagi áigi go Finnmárkku fylkkagielda ja Arkhangelsk vuolláičálle dan vuosttaš formála ovttasbargošiehtadusa.
Festiválas lágiduvvui konferánsa gos gehččet vejolašvuođaid nannet riikkaidgaskasaš ovttasbarggu.
Das čájehii fylkkavárresátnejođiheaddji dan dehálaš Pomoragávppi mii dagahii ovdáneami ja buorredilálašvuođa Davvi-Norggas ja man dehálaš lea riikkaidgaskasaš ovttasbargu.
