-Almmuhus-
-Almmuhus-
OAIVILAT Finnmárku lea giellame oktii

Finnmárku lea giellame oktii

-

-

Juohke olmmoš gii vánddarda sihke mehciid, márkanbáikkis ja biilaluottaid mielde lea sihkkarit oaidnán man olu muorra lea šaddan moattilot jagis min guovlluide. Muorra lea ihtán dakkár sajiide gos ii leat ovdal leamaš ja orru nu ahte dat ii bisán dása. Mii dasa lea sivvan lea váttis diehtit, muhto dat mii lea áibbas sihkar lea ahte dat hehtte vánddardeame muhtin sajiin. Ja biilaluoddaravddain lea njuolgut várálažžan jus bálle šaddat. Dat čohkke elliid luotta lagabui ja daguha vel nu ahte biilavuoddji ii fuomáš daid nu álkit.

Ovdamearka lea Guovdageainnu-Máze gaskka. Vaikko Stáhta geaidnodoaimmahat gal dikšu luoddabealláid de berrešii njáskat olu eambbo vuoi šadda eambbo rabas ja vánddardeaddjit oidnet buorebut visot mii lea lahka luotta. Guovdageainnu márkanbáikkis lea maid nu olu muorra šaddan ahte dat hehtte vánddardeami ja dagaha vel heajut sihkarvuođa geaidnojohtolahkii. Buorre ovdamearkan man fiinnis ja buorre sáhttá šaddat, lea jus bisána Mázes alážis gos Máze gilisearvi lea njáskan. Das lea dál nu rabas ja oaidná viidát.

Árja oaivvilda ahte dál lea áigi njáskat viidát sihke márkanbáikkis ja vel luoddaguoraid suohkanis.

Dat addá buoret sihkarvuođa ja buohkaide vel olu suohttaset vánddardit jus ovdamearkka dihte beassá vuodjit ja oaidnit joga olles áiggi.

Dákkár njáskanbargu livččii buorre geassebargu nuoraide, ja berrešii álggahuvvot márkanbáikkis ovddemus.

Seammás gártá olu muorra maid ásahusat nugo Guovdageainnu bargoguovddáš beasašii buvttadit ja vuovdit.

Árja háliida ahte FEFO, Stáhta geaidnodoaimmahat, Guovdageainnu suohkan, Sámediggi ja vel earát geaidda sáhttá guoskat, geahčadit vejolašvuođa njáskat Guovdageainnu márkanbáikkis ja jogaid ja luottaid gaskkaid vai šaddá eambbo rabas vai sihke oaidná buorebut ja seammás ii čohkke elliid luotta ala ja dainna lágiin buorida johtolatsihkarvuođa ja ásaha vel bargosajiid.

Čállán:

Árjja 1.evttohas Sámediggái Ávjovári válgabiirres

Isak Ole J. Hætta

-Almmuhus-