Stáhtaministara Erna Solberga (O) mielas lea váivi go lea čuožžilan dakkár digaštallan fylkkaidovttastahttiima birra Finnmárkkus, muhto ii loga gal jorgalit dán áššis.
Stáhtaministara Erna Solberga (O) mielas lea váivi go lea čuožžilan dakkár digaštallan fylkkaidovttastahttiima birra Finnmárkkus, muhto ii loga gal jorgalit dán áššis.
– Lea dehálaš muitit ahte ášši lea guovtti fylkka ovttastahttima ja fylkkasuohkana bargguid birra. Dát ii mearkkaš ahte mii sihkkut Finnmárkku. Finnmárku galgá leat das gos agibeaivvi lea leamaš, dadjá Solberg NTB:i.
Son oaivvilda ahte ášši ii guoskka dušše Finnmárkui ja Romsii, muhto olles guovlluođastussii.
– Go Romsa ja Finnmárku eai áiggo ovttastuvvot, de šaddá hástalussan olles guovlluođastussii. Finnmárku lea hui unna fylkkaš go geahččá álbmotlogu. Jus galgat sirdit bargguid ja bálvalusaid, de dárbbahuvvo stuorát álbmotvuođđu, dajái Solberg iežas pressekonferánssas mii dán jáhkebeali dollui distaga.
Geasseluomus jurddahallat
Álbmotjienasteamis, mii giđđat dollui, dadje 87 proseantta finnmárkulaččain ahte eai hálit ovttastahttot Romssain.
Finnmárkku Fylkadiggi lea biehttalan válljet miellahtuid oktasašlávdegoddái mas fylkkat galget fárrolaga ráhkkanit dan ođđa oktasašregiovdnii.
Gielda- ja ođasmahttinministtar Monica Mæland (O) mearridii ahte lávegoddi sáhttá ásahuvvot vaikko eai leat Finnmárkku miellahtut, muhto dan gal vuosttaldedje muhtin bellodagat Romssas.
– Dál mun jáhkán lea buoremus ahte váldit geasseluomu. Buohkat de besset jurddahallat mo dilálašvuohta lea ovddos guvlui, dadjá Solberg.
Muhto son šiitá ahte ráđđehus galgá jurdilit oktii vel dan birra.
– Mis gal lea vuolggasadji das ahte mis lea ođastus man Stuoradiggi lea mearridan. Ráđđehus lea unnitlogu ráđđehus. Mii čađahit dan maid Stuoradiggi lea mearridan, dadjá stáhtaministtar.
(©NTB)
