-Almmuhus-
-Almmuhus-
-Almmuhus-
SMÁVVAOĐĐASATFinnmarks­løpet ja Ovddos ožžot doarjagiid 

Finnmarks­løpet ja Ovddos ožžot doarjagiid 

-

-

Sámediggeráđđi lea juolludan 131 200 ruvdnosaš doarjaga Finnmarksløpet AS:i ja 95 000 ruvdnosaš doarjaga Ovddos AS:i.

Finnmarksløpet AS:i juolluduvvui doarjja Finnmarksløpet 2022 čađaheapmái. Finnmarksløpet lea Eurohpá guhkimus beanagilvu, ja lea máŋgii ovdal ožžon doarjaga Sámedikkis iešguđetlágan prošeavttaide mat galget veahkkin ovdánahttit gilvvu sámi profiilla. Nu čállá Sámediggi preassadieđáhusas. 

– Finnmarksløpet lea dehálaš sihke valáštallanlágideapmin, muhto maid kulturdoallun mii ovdanbuktá Finnmárkku kultuvrralaš beali gussiide ja tv-gehččiide. Sámediggái lea dehálaš doarjut prošeavttaid mat ovddidit sámi giela, kultuvrra ja servodateallima, dadjá sámediggepresideanta Silje Karine Muotka (NSR) preassadieđáhusas. 

Romssa ja Finnmárkku fylkkagielda maid doarju prošeavtta. Ovttasbargošiehtadusas Sámedikki ja Romssa ja Finnmárkku fylkkagieldda gaskkas lea mihttomearri searvevuođas váikkuhit regiovnna prošeavttaide.

Hástalit olbmuid Guovdageidnui

Ovddos AS lea ožžon doarjaga promoteret Guovdageainnu bivnnuhis ja gelddolaš orrun- ja bargosadjin. Guovdageainnu suohkan eaiggáduššá Ovddos AS, mas lea ovddasvástádus hálddašit nuppástuhttinruđa maid suohkan oažžu. Okta ágga doarjagii lei ahte dá lea ovttasbargoprošeakta mii galgá váikkuhit buoret rekrutteremii olu dehálaš sámi ásahusaide Guovdageainnus.

– Min mielas orru rievttes vuohki ahte organisašuvnnat ja fitnodagat ovttaráđálaččat geahččalit čoavdit oktasaš rekrutterenhástalusaid. Lea buorre go searvevuođas válljejit promoteret báikegotti vejolašvuođaid geasuhan dihte ođđa bargonávccaid, dan sadjái ahte háhkan šaddá hástalussan juohke organisašuvdnii man iehčanassii fertejit čoavdilit, lohká sámediggepresideanta Silje Karine Muotka.

Doarjagat addojit doarjjaortnegis Doarjja regionálaovddidanprošeavttaide.

-Almmuhus-