2021:s ledje ges 174:s Finnmárkkus geat sáhkkohalle dan geažil. Ung i Trafikken -ovddasteaddji Liv Marie Bendheim muitala ahte lea hirpmahuhtti oaidnit nu stuora lassáneami Finnmárkkus.
Muđui lea eará fylkkain njiedjan dat lohkku. Goitge oaivvilda Ung i Trafikken ahte leat beare oallugat geat čuggot telefovnna vuojidettiin.
– Lea illudahtti oaidnit ahte lohku lea njiedjan máŋgga fylkkas, muhto mii ballat ahte leat olu sevdnjeslogut.
Heakkavárálaš váikkuhusat
Bendheim deattuha ahte váilevaš áicilvuohta lea sivvan olu johtolatlihkohisvuođaide, danin lea bahá geavahit telefovnna vuojidettiin.
Son muitala ahte biila mas lea leahttu 80 km/d manná 90 mehtera njealji sekunddas. Jus dáin njealji sekunddas ii konsentrere, de sáhttá heakkavárálaš váikkuhusaid mielddisbuktit.
– Jus lea áicil, de lea olu unnit vejolašvuohta geavvat duođalaš lihkohisvuhtii. Danin lea mis álkes ávžžuhus, ahte galgá eret bidjat telefovnna go galgá vuodjit.
Jápminlogut lassánan diibmá
Diibmá dušše 118 olbmo johtolagas. 2021 rájes lea dat lohku lassánan 33 proseanttain, dalle ledje 80 olbmo geat dušše.
Dál lea maiddai nu ahte vuoddji sáhkkohallá 7450 ruvnnuin ja golmma čuoggáin jus geavaha telefovnna vuojidettiin. Sii geat leat geahččalanáiggis ožžot guhtta čuoggá.
