Fylkkageaidnu 98, mii manná Idjavuonduoddara badjel lea ožžon bálkkašumi, go lea Norgga čábbámus luodda bálkkašumi. Lea guokte jagi áigi go maŋemuš juhke dán bálkkašumi, dalle vuittii maid Finnmárku.
– Lea gudni sihke Finnmárkui, min lundui ja čađahanfápmui mii lea stuora prošeavttaide, lohká Geir Ove Bakken. Son lea johtalus váldolávdegotti jođiheaddji.
Son lohká ahte bálkkašupmi čájeha ahte fylkkas lea gelbbolaš fágabiras, erenoamážit go lea nubbi vuoitu. Bakken muitala ahte jurdagat mannet ovddeš mielbargái, Roger Hansenii.
– Son lei láidesteaddji dan barggus, olu gudni gullá sutnje, lohká Bakken.
Guokte jagi maŋŋálaga
«Luoddadirektevrra bálkkašupmi čáppa luottaide» lea bálkkašumi namma, ja das lea olu árvofápmu. Addo luottaide main leat buorit estehtalaš bealit mat leat heivehuvvon birrasiidda. Prošeavtta obbalašvuohta árvvoštallojuvvo. Plánen, huksen, doaibma ja geavaheapmi.
Bálkkašupmi juhkkojuvvo juohke nuppi jagi. Mannán háve vuittii maid Finnmárku. Dalle lei uđassihkkarastinbargu mii dagahii vuoittu, Skjarvelandet buohta, Báhkavuonas. Fylkageainnus 889, mii manná Ávanuorrái.
Jury ákkastallan
Jury ákkastallá ahte luodda mii manná Idjavuonduoddara badjel, addá liige oali go vuodjá duoddara badjel. Erenoamážit go fiertu lea, oaidná viidát. Luoddabarggus leat maid sámi kulturmuittut váldon vuhtii.
– Lea hirbmat buorre ovdamearka movt sáhttá vuhtiiváldit birrasa go ráhkada ođđa luotta. Dálvedoaibma lea maid vuhtiiváldojuvvon, čuočču jury cealkámušas.
Sii leat lokten luotta, vai ii čohkke muohttaga luotta ala. Dat bargu lea hástaleaddji dákkár eatnamiid. Idjavuonduottar-luodda lei gárvvis jagi 2015.
Finnmárkku fylkkagielda lea bidjan badjelaš bealle milliarda ruvnno luoddabargui. Lea áigumuš buoridit fylkkageainnu vel eambbo, gaskkal Leavnnja ja Deanu šaldi.
– Luodda čatná olles fylkka oktii, ja nanne riddoguovlluid, ja min deháleamos ealáhusa, guolásteami. Luodda maid geasuha turisttaid riddoguovlluide, ja dainna oažžu leahkit rámis, lohká Geir Ove Bakken.
