-Almmuhus-
SMÁVVAOĐĐASATFinnmárkkus lea dál elliid­politiija 

Finnmárkkus lea dál elliid­politiija 

-

-

Borgemánu 31. beaivvi rájes lea Finnmárkku politiijaguvlui boahtán elliidpolitiija. – Elliin eai leat jienat maiguin hupmet, dan dihte lea dehálaš ahte gávdno elliidpolitiija mii sáhttá ovddastit elliid buorredili. Moai letne gergosat bargagoahtit dán suorggis, muitaleaba Martine Moore ja Nicholas Aase, geat leaba Finnmárkku vuosttaš elliidpolitiijabálvvát.

Finnmárkku politiijaguovlu dieđiha preassadieđáhusa bokte ahte Finnmárkui boahtá dál elliidpolitiija. Martine Moore ja Nicholas Aase, geat leaba elliidpolitiijabálvvát, muitaleaba ahte go Finnmárkkus dál lea ásahuvvon elliidpolitiija, de galgá boahtit eambbo čalmmustahttin fágasuorggis, seammás ahte šaddá álkibun almmustahttit ja eastadit rihkolašvuođaid mat gusket elliide.

– Mii galgat olles Finnmárkku politiijaguovllus dutkat duođalaš elliidčálgolága rihkkumiid ja eastadit elliidčálgokriminalitehta. Elliidpolitiijat galget bagadallat ja addit fágalaš ráđiid áššiide mat gusket elliidčálgui, muitaleaba elliidpolitiijabálvvát.

Finnmárkku politiijaguovlu dieđiha ahte elliidpolitiija ulbmil lea gáhttet ja ovddastit sihke buorredili ja áktejumi elliide. Ellidčálgunlága goalmmát paragráfas čuožžu dál ahte «Elliin lea iešárvu, beroškeahttá makkár ávkkástallanárvu dain lea olbmuide. Elliid ferte gieđahallat bures, ja suodjalit dárbbašmeahttun dávgguid ja nođiid vuostá.»

– Mii háliidit buot áššiid váldit duođalaččat

– Mii háliidit eastadit ja dutkat áššiid mat gusket vearrodaguide elliid vuostá ja elliidčálgolága rihkkumiidda. Dakkár áššiide gusket veahkaváldimat elliid vuostá, elliid goarideamit, seksuála illasteamit elliid vuostá ja beanalága rihkkumat. Elliidpolitiija galgá earret eará čađahit bearráigeahču.

Elliidpolitiijain lea ovttasbargu earret eará Biebmobearráigehččiin, šibitdoaktáriiguin, Boazopolitiijain, Duollodoaimmahusain ja biraskriminalitehtakoordináhtoriin. Finnmárkku politiijaguovlu deattuha ahte lea dehálaš ahte olbmot dihtet dál gávdno Finnmárkkus elliidpolitiija, nu ahte dál sáhttet dieđihit áššiid ja sáddet cavgilemiid elliidpolitiijai.

– Mii háliidit buot áššit váldit duođalaččat, ja árvvoštallat jus mii galgat álggahit dutkama áššiin mat bohtet. Midjiide lea dehálaš ahte mis lea buorre ovttasbargu álbmogiin ja olgguldas aktevrraiguin, ja ahte áššit dieđihuvvojit midjiide vai mii beassat daid dutkat. Min mihttu lea ahte Finnmárkkus galgá elliin buorre čálgu, ja dan mii háliidit olahit, loahpaheaba Aase ja Moore.

-Almmuhus-