78 proseantta leat nu vástidan NAF Romssa ja Finnmárkku johtolatbaromehterii 2023. Muđui Norggas geainnuid standárda vuorjá 68 proseantta olbmuid.
– Olbmot vásihit ahte geainnut maid sii atnet beaivválaččat eai leat oadjebasat. Ii olbmuid geažil, muhto dan man standárddas dat leat. Dat lea duođalaš várohus buot fylkkapolitihkkariidda smiehttat vuoruhemiid birra, dadjá NAF gulahallanolmmoš Ingunn Handagard preassadieđu bokte.
Geainnuid standárda ja kvaliteahta Finnmárkkus ja Romssas lea eanemus vuorjašuhtti ášši mii guoská johtolahkii. Dat vuorjašuhttá johtolatbaromehtera mielde eambbo go gárrenvuoddjit ja lihkuhisvuođat geainnu alde.
Geainnuid ortnegisdoallan dálvet lea dat mii nubbin eanemusat vuorjá olbmuid Romssas ja Finnmárkkus, 71 proseantta. Norggas muđui 60 proseantta vuorjašuvvet dainna.
Váralaš dilit biillaid ja sihkkeliid gaskkas vuorjašuvvet seamma olu Norggas go sierra Romssas ja Finnmárkkus, namalassii 62 proseantta.
