-Almmuhus-
OĐĐASAT– Finnmárkkus galggašii geahččaladdat birasseasti girdiid

– Finnmárkkus galggašii geahččaladdat birasseasti girdiid

-

-

Ruoná birasbellodat háliida ahte Finnmárkkus galggašii geahččaladdagoahtit birasseasti girdiid.

Ruoná birasbellodaga stuoradiggeáirras Rasmus Hansson lohká NRK:i ahte áibmojohtolat lea dán rádjái beassan láhttet dego birasváttisvuohta ii gula sidjiide maid.

Son lohká girditeknologiija ovdána jođánit, Finnmárkku gaskkaid dihte lohká buorren hárjehallat birasseasti áibmojohtolaga.

– Lean ieš leamaš elektrihkalaš girdis. Ruoná birasbellodaga mielas livččii gelddolaš válljet Finnmárkku báikin gos galgá geahččaladdat teknologiija, lohká son.

 

Eai beasa deavdit bio-boaldámuša

Widerøe gulahallandirektevra Silje Brandvoll ii leat ovttaoaivilis ahte áibmojohtolat ii beroš birrasis.

Son čujuha Widerøe šiehtadussii, go leat šiehttan oastit girdiid main lea ođđa teknologiija, ja mat leat eambbo birasseastit.

Girdifitnodat lea maid molson buot girdimutuvrraid, vai galgá sáhttit atnit bio-boaldámuša.

– Stuorámus váttisvuohta dál lea ahte ii beasa bio-boaldámuša deavdit eará sajis go Oslos. Mii gal searvat hástalussii jus Finnmárkkus beasašii maid deavdit bio-boaldámuša, lohká Brandvoll. ©NTB

-Almmuhus-