Buozalmasjávkamat Finnmárkkus njidje goalmmát kvartálas 7.8 %, diimmá ektui, dieđiha NAV Finnmárku preassadieđáhusas.
Jávkamat buozalmasvuođa geažil leat dán áigodagas 5.8 proseantta ja lea vuolimus lohku mii goasse lea leamaš Finnmárkkus.
Okta sivva manne doavtterdieđihuvvon buozalmasjávkan njiedjá Finnmárkkus, sáhttá leat go bargomárkanis lea positiivvalaš ovdáneapmi.
Lassin lea Finnmárkku NAV ovttasbargan bargoeallima oasálaččaiguin, háhkan dihte iešguđet doaimmaid eastadan dihtii buozalmasvuođajávkama ja maiddái oažžut buohccindieđihuvvon bargiid fas bargui.
Bargoaddit eambbo aktiiva
– Mii vásihit stuorra beroštumi suohkaniin ja doaimmahagain ovttasbargat minguin eastademiin ja čuovvolemiin. Bargoaddit ja luohttámušolbmot leat eambbo aktiiva go goasse ovdal. Maiddái leat oasálaččat bargoeallimis leamaš áŋgirat oažžut buozalmasjávkama njiedjat. Dat lea hirbmat movttiidahtti go logut njidjet, lohká Finnmárkku NAV bargoeallinguovddáža ossodathoavda Dagfinn Gjerde preassadieđáhusas.
Finnmárkkus lea eanemus oassi buohccindieđihuvvon deahke- ja čielgeriggegillámuša dihte (36,3 %) ja psyhkalaš gillámušaid dihte (17,4 %).
Unjárggas lea alimus buozalmasvuođajávkan (7,3 %) ja Muosáin lea unnimus (2,6 %).
