Fylkkaráđđealmmai sávvá jođánisfatnasa mannat Čáhcesullo, Buođggáid ja Girkonjárgga gaskkas, mii johtá hydrogenaboaldámušain. Boahtte vahkku galgá fylkadiggi meannudit dan ášši
Fylkkaráđđealmmái Øystein Ruud áiggošii geahččalit guokte jagi geahččalanortnega Várjjatvuonas. Son ávžžuha fylkadikki čuovvulit fylkkaráđđealbmá meannudeami, čállá Finnmárkku fylkkagielda preassadieđáhusas.
Fylkkagielda áigu geavahit alternatiiva energiija
– Globála dálkkádathástalusat leat stuorrát ja gáibidit servvodatlaš rievdadusaid, nu go CO2 luoitima unnideami johtolagas. Finnmárkku fylkkagieldda mihttu lea geavahit alternatiiva energiijaid kollektiivajohtolagas ovdal 2026, čállá Ruud áššeovddidusas.
– Máŋggas leat cealkán ahte hydrogena lea buorre energiijaguoddin boahtteáiggi dálkkádahkii. Hydrogen buvttaduvvo iešguđetlágan energiijagálduin, nu go ovdamearkka dihte luonddugássain ja bieggafámuin. Hydrogena, mii lea buvttaduvvon bieggafámuin, ii nuoskkit ja gohčoduvvo «ruoná hydrogenan». Finnmárkkus lea buoremus bieggafápmu, mii addá stuorimus ovdamuni gánnáhahtti buvttadeami ektui ja ruoná hydrogena geavaheami, čuožžu áššeovddidusas.
Mihttu leat njunušbuvttadeaddjin
Finnmárkku fylkkagielda sávvá geahččalit hydrogenortnega boaldámuššan, ja leat álggahan ovdaprošeavtta, ja ohcan doarjaga EO-prográmmas «Horizon 2020».
Varanger Kraft álggaha Bearalvági suohkanis geahččalanbuvttadeami čakčii. Varanger Krafthydrogenas lea mihttu šaddat Norgga stuorimus buvttadeaddjin CO2 hydrogenabuvttadeamis dán jagi. Hydrogenvuoruheapmi sáhttá ovdánahttit eará nanaguoddevaš ealáhusa Finnmárkkus, čállá Finnmárkku fylkkagielda preassadieđáhusas.
