Lagabui 160 vuoddji čoahkkanit Kárášjohkii Skábmavuodjangilvvuide.
Skábmamánu 5. ja 6. beaivvi lágida Kárášjoga vuodjansearvi dán jagi stuorámus vuodjangilvvuid Finnmárkkus.
Kárášjoga vuodjansearvi lohká koronapandemiija dagahan ahte ollu vuoddjit heite valáštallamis, muhto dál oaivvilda vuodjansearvi ahte treanda lea jorggihan. Vahkkoloahpas bohtet lagabui 160 vuoddji searvat gilvvuide Kárášjogas. Dain vuddjiin leat 65:s ođđa gilvaleaddji.
Romssas ja Finnmárkkus leat 12 vuodjansearvvi dieđihan vuddjiid Skábmavuodjan-gilvvuide.
– Lea hui somá oaidnit ahte maiddái Deanu vuodjansearvvis, mii lea oalle ođđa vuodjansearvi, servet gilvvuide, čállá Kárášjoga vuodjansearvi preassadieđáhusas.
