Anton Dahl lea válljejuvvon Finnmárkku Olggostallanráđi vuosttaš stivrajođiheaddjin.
Anton Dahl lea válljejuvvon Finnmárkku Olggostallanráđi vuosttaš stivrajođiheaddjin.
Guovdageainnu ovddeš sátnejođiheaddji, Anton Dahl lea dál válljejuvvon Finnmárkku Olggostallanráđi (Finnmark Friluftsråd) stivrajođiheaddjin. Ikte nammaduvvui ráđi vuosttaš stivra.
Mátta-Várjjaga várresátnejođiheaddji Lena Norum Bergeng lea nubbinjođiheaddji. Deanu sátnejođiheaddji Frank Martin Ingilæ, Kárášjoga várresátnejođiheaddji John Nystad ja Turid Lien Hámmerfeasta suohkanis leat stivraláhtut.
Aitto ásahuvvon ráđđi lea Norgga áidna olggostallanráđđi mii gokčá olles fylkka. Ii leat dušše geografiija mii dahká ahte Finnmárkku Olggostallanráđđi lea stuorát go eará olggostallanráđit riikas.
Finnmárkku Olggostallanráđis leat maid eambbo suohkanat mielde go earáin.
Stuora olggostallanráđđi
Diibmá, 2015:s lei olggostallama jahki. Dalle álggahuvvui maid bargu oažžut suohkangaskasaš ovttasbarggu Finnmárkkus. Finnmárkkus leat dál 16 suohkana mielde ovttasbarggus.
Dat golbma suohkana mat eai vel leat mielde olggostallanráđis, galget dálvet gieđahallat aigot go searvat. Anton Dahl sávvá ja jáhkká ahte buot 19 suohkana servet.
– Mii galgat leat oidnosis, ja galgat olahit máŋggabealálaš bohtosiid. Dat galget buorrin álbmogii, suohkaniidda ja olggostallamii Finnmárkkus. Lea hui erenoamáš go ná olu suohkanat leat mielde ovttasbarggus, lohká Dahl.
Olu doaimmat
Anton Dahl lea ieš áŋgir olggostallamis, Guovdageainnu skuvllas, ja maid nuoraiguin. Ovttasbargu skuvllaiguin ja mánáidgárddiin lea dehálaš bargu olggostallanráđis.
Beaivválaš jođiheaddji Hugo Tingvoll jáhkká ahte dat ođđa ovttasbargu boahtá buktit fuomášumi “Perletur” doibmii. 1 500 olbmo serve “Perletur” tuvrakássa prošektii mii lei mannán giđa.
Oktiibuot vázze 15 000 tuvrra, 11 suohkaniin.
– Mihttun lea oažžut “Perletur” buot suohkaniidda 2017:s. Juovlamánu čađaheimmet sullásaš doaimma, “JuleSPREK” (juovlalášmmat). Dat lei Álttás, Hammerfeasttas ja Várggáin. Lea dehálaš ovttasbargat singuin geat álbmotdearvvašvuođain barget. Mii sávvat maid ahte olbmot geat bohtet eará riikkain, galget beassat oahpásnuvvat Finnmárkku lundui, lohká Tingvoll.
Son namuha maid ahte okta dehálaš bargu lea ásahit olggostallanskuvllaid mánáide luomuin. Mannán geasi ledje čieža suohkanis olggostallanskuvllat.
– Jáhkán ahte šaddá sullásaš fálaldat boahtte geasi maid, eanas min suohkaniin. Mii sávvat ahte sátnejođiheaddjit servet tuvrajođiheaddjin. Jáhkán 2017 šaddá gelddolaš olggostallan jahki, lohká beaivválaš jođiheaddji Hugo Tingvoll.
