Leat buoret logut buot fylkkain, muhto Finnmárku lea vuolemusas.
Oahppodepartemeanta čállá preassadieđáhusas ahte eai goasse leat nu ollu oahppit ollašuhttán joatkkaskuvlla go sii geat álge 2013:s. Buot fylkkain leat eanet oahppit geat čađahit, muhto Finnmárkkus hárvvimusat ollašuhttet skuvlla.
– Lea buorre go eanet oahppit čađahit ja cevzet joatkkaskuvlla. Ráđđehusa mihttu lea ahte unnimus 90 proseantta galget ollašuhttit. Danne boahtá mis ođđa joatkkaskuvlaođastus giđđat, mii galgá addit buohkaide vejolašvuođa lihkostuvvat, dadjá oahppo- ja integrerenministtar Guri Melby(G) preassadieđáhusas.
Erohus
Vuođđun leat ođđa logut maid Oahpahusdirektoráhtta almmuha odne. Dat maiddái čájehit ahte sii geat váldet oahppospesialiserema, sii ollašuhttet dávjjibut go sii geat fidnofágaid váldet, namalassii 87,6 proseantta ja 67,5 proseantta.
– Dálá joatkkaskuvlaoahpaheamis leat ollu hástalusat. Ollu ohppiin ii lea vuđolaš máhttu dárogielas, matematihkas ja eŋgelasgielas. Mii diehtit ahte dađi eanet rahčet psyhkalaččat, ja go lea riekti dušše golbma jagi oahpaheapmái, orru dat hehttehussan. Dan mii galgat čoavdit go ođastus joatkkaskuvlla oahpaheapmái boahtá, dadjá Melby ja lasiha:
– Mađi eanet ollašuhttet, dađi unnit riska lea ahte eai beasa bargoeallimii.
