-Almmuhus-
OĐĐASATFinnmárkku nuorat čuorbbimusat rehkenastit

Finnmárkku nuorat čuorbbimusat rehkenastit

-

-

Norgga nuorat eai leamaš goassege nu čuobbi rehkenastit go dál, 10.luohkálaččaid gaskamearálaš árvosátni rehketeksámenis lei 2,9 mannan giđa. Dađi davvelis, mađi čuorbbit leat nuorat rehkenastit.

Okta nubbi stáhtaráđđi lea háliidan čoavdit rehket fága kriisa, muhto norgalaš nuorat eai šatta čeahpit rehkenastit. Oahpahusdirektoráhta logut čájehit ahte 10.luohkálaččaid gaskamearálaš árvosátni maŋŋel mannan giđa eksámena lei 2,9, ii goassege ovdal leamaš gaskamearálaš árvosátni vuollel 3. Dan čállá VG aviisa.

 

10.LUOHKÁLAČČAID EKSÁMENBOHTOSAT REHKEGIS 

Gaskamearálaš árvosátni Norggas: 2,9

Østfold: 2,8

Akershus: 3,1

Oslo: 3,2

Hedmark: 2,8

Oppland: 2,8

Buskerud: 2,8

Vestfold: 2,9

Telemark: 2,6

Aust-Agder: 2,7

Vest-Agder: 2,9

Rogaland: 3,0

Hordaland: 2,9

Sogn og Fjordane 3,0

Møre og Romsdal. 2,8

Mátta-Trøndelag: 2,9

Davvi-Trøndelag: 2,7

Nordlánd: 2,7

Romsa: 2,7

Finnmárku: 2,3

Oahpahusdirektoráhta statistihkka ovdal go 10.luohkálaččat leat ožžon vejolašvuođa váidit árvosániid.

Davvin čuorbbimusat

Golmma jagi áigi čájehedje norgalaš skuvlaoahppit TIMSS internašunála rehket-geahččaleamis ahte leat šaddan čeahpibun, muhto dát bohtosat eai joatkkašuvvan. Mannan giđa bohtosat čájehit maiddái ahte mađi davvelii ollet, dađi čuorbbit leat nuorat rehkenastit. Davvi-Trøndelagas, Nordlánddas ja Romssas lei gaskamearálaš árvosátni 2,7 ja Finnmárkkus ges 2,3. Finnmárkku nuorat leat čuorbbimusat olles Norggas, ja oaivegávpogis ges čeahpimusat. Statistihkka čájeha ahte Oslo 10.luohkálaččaid gaskamearálaš árvosátni lea 3,2, Akershus nuoraid ges 3,1. Maiddái Rogalanda ja Sogn og Fjordane nuorat leat čeahpit go gaskamearálaš 10.luohkálaččat, doppe ožžo golmmeža árvosátnin.

 

Vuot fuolastuvvan

Oahpahusdirektoráhta ossodatdirektevra, Sissel Skillinghaug muitala VG:i ahte geahččaladdet iešguđetlágan oahpahusvugiid buoredandihti Norgga nuoraid rehketgelbbolašvuođa, muhto son ii loga diehtit makkár vuohki livččii buoremus. Son lea fuolastuvvan.

 – Heajos eksámenbohtosat fuolastahttet min. Mii diehtit ahte Norgga nuorat eai birgehala beare bures internašunála rehketiskkademiin. Jahkásaččat árvvoštallat dihto eksámeniid dahje fáttáid, heajos bohtosat čájehit čielgasit ahte fertet geahčadit rehketeksámena bargohivvodaga ja dási, lohká son.

 

Joatkkaskuvllas maiddái heajos bohtosat

Eai leat dušše nuoraidskuvlaoahppit geat rahčet rehkegis, maiddái Norgga joatkkaskuvlaohppiin leat heajos bohtosat rehkegis. Eksámeniin leat oallugat geat ožžot dušše árvosáni 1 dahje 2. Praktihkalaš rehketfágas oažžu badjel bealli ohppiin 1 dahje 2 árvosátnin.

 

 

-Almmuhus-