Deanušalddi skuvlla 4. luohká mánát ledje buoremusat njuikut olles Norggas, ja vuite 10 000 ruvnno maid odne ožžo.
Deanušalddi skuvlla oahppit eai diehtán maidege vuoittu birra go ožžo diehtit dan birra disdaga diibmu 12:s.
Sii serve Álbmotdearvvašvuođa našunálasearvvi njuikungilvui, ja dan sii nagodedje vuoitit.
Diimmu juohke beaivvi
Olles riikkas leat 100 000 máná, gaskal 4.luohká ja 7.luohká, searvan Álbmotdearvvašvuođa našunálasearvvi jahkásaš njuikungilvui, «Hopp for hjertet» (njuikko váimmu dihte).
Birrasii bealli Norgga mánáidskuvllain leat searvan dasa. Guovtti vahkkus galge mánát njuikut, ja oahppit leat gaskamearálaččat njuikon birrasii 25 minuhta juohke beaivvi. Dat 12 oahppi njealját luohkás Deanušalddi skuvllas njuiko gaskamearálaččat 60 minuhta juohke beaivvi.
Bálkkašupmi
Dál ožžot 10 000 ruvnno dan garra barggu ovddas. Fylkkastivrra jođiheaddji Helge Ovanger, ovttas Målfrid Ovangeriin ja doaibmakoordináhtoriin Kirsten Greiner Oveseniin, addet bálkkašumi mánáide.
– Njuikut lea somá, gelddolaš, hástaleaddji ja sosiála. Dasa lassin lea buorre dearvvašvuhtii. Mii áigut movttiidahttit mánáid lihkadit eanet juohke skuvlabeaivvi, lohká Álbmotdearvvašvuođa našunálasearvvi váldočálli Lisbet Rugtvedt preassadieđáhusas.
<!–*/
/*–>*/
