Finnmárkku jortamovrraid báikkálaš searvi Hámmárfeasttas čájeha doarjaga oappáide ja vieljaide Standing Rockas.
Finnmárkku jortamovrraid báikkálaš searvi Hámmárfeasttas čájeha doarjaga oappáide ja vieljaide Standing Rockas.
Skábmamánu 17. beaivvi čálii jortamovrasearvi cealkámuša mas sii dorjot Standing Rock vuosttaldeami oljorevrehuksemii. Sii sáddejit dearvvuođaid bargoustibiidda, oappáide ja vieljaide eallima čázi doarruma ovddas mii golgá Missouri jogas. Oljorevrre leat plánen hukset guđa eamiálbmoga guovllu čađa, Kanadas gitta Illinois rádjái. Huksen billista eatnamiid, loavkida eamiálbmoga bassi báikkiid, ja lea stuora várra ahte čáhci nuoskkiduvvo, cealkiba jortamovrasearvvi fylkkajođiheaddji Annie Henriksen ja Hámmárfeastta báikkálaš searvvi jođiheaddji Marte S Dahlen.
Várjalit ja suddjet
– Eamiálbmogiid sorjjasmeahttunvuohta čájehuvvo nissoniid ja nissoniid dearvvašvuođa albma doarjaga bokte. Seamma vuogi mielde movt mii gáhttet eatnama, de fertet mii várjalit ja suddjet nissonolbmo ja boahttevaš buolvva mánáid geaid riegádahttit, dadjá Carolina Reyes Standing Rockas.
Jortamovrrat beroštit luonddugáhttemis
Finnmárkku/Sámi jortamovrrat lea guovtti jahkecealkámušain (2014 ja 2015) ávžžuhan gáhttet meara, ja hehttet ruvkedoaimma mirkkuid luoitimis Riehpovutnii.
– Mii leat vuostá eallámušráiddu nuoskkideapmái, ja vuorjašuvvat iežamet mánáid boahtteáiggi dearvvašvuođa ovddas. Go diehtit makkár vásáhus ja máhttu mis lea birasmirkkuid ja lossametállaid birra, lohket jortamovrrat.
– Standing Rock jortamovrrat leat bálkáhan iežaset oljorevrevuosttaldeapmái, iežaset guovlluin. Sii leat ceggen sierra tipiid gos nissonat sáhttet riegádahttit. Sii veahkehit doaruhuvvon nissoniid. Mii atnit árvvus sin, ja mii leat rápmásat iežamet bargojoavkku ovddas geat barget Standing Rockas, cealká jortamovrasearvi.
