Finnmárkku joavku «Ondt Blod» oažžu buriid árvosániid Norgga musihkkaárvvoštalliin. Boahtte vahkku almmuha joavku ođđa musihkakaseahta.
Finnmárkku joavku «Ondt Blod» oažžu buriid árvosániid Norgga musihkkaárvvoštalliin. Boahtte vahkku almmuha joavku ođđa musihkakaseahta.
Kaseahttačuojanasat eai leat dán áigge nu dábálaččat, muhto Girkonjárgga joavku almmuha ođđa musihka boahtte vahkku kaseahta ja digitála hámis.
Vaikko dus ii soaitte leat kaseahttačuojahanrusttet, de oaččut ovtta koda mainna sáhtát viežžat lávlagiid digitálahámis lassin. Eai leat go čuođi kaseahta maid joavku vuovdá.
Ožžon buriid árvosániid
NRK P3 musihkkaárvvoštalli Jørn Kaarstad lohká árvvoštallamis ahte lea hárve go garrarock-joavkkut su hirpmáhuhttet nu go dát finnmárkulaččat dahket «Finnmark» skearruin.
– Lea dakkár duostilvuohta mii dahká «Finnmark» skearru nu buorren. Ii goasse dieđe mii boahtá, fáhkkestaga ja lunddolaččat. Jietnagovva lea galmmas ja garas ja govvida bures lávlu Aslak Heika Hætta Bjørn sevdnjes teavsttaid vuohkkasit. Ieža čállet preassadieđáhusas ahte teavsttat leat industriija, gilistálu, badjelgeahččama ja rámisvuođa birra, oaivvilda Kaarstad.
Bajimusas suorggis
Viidáset čállá Kaarstad: «Finnmárku čájeha ahte leat bajimusas Norgga garrarocka suorggis. Joavku, mas leat nanu ruohttasat ja dustet geahččalit ođđa vugiid ja lihkostuvvat dainna. by:Larm hoavddat galggaše fuobmát dán joavkku, go álget hupmat dan dábálaš «rock lea jápmán» ságastallama. Rock gal eallá bures dán viđa girkonjárgalačča luhtte, ja ollu earáid luhtte. Ii leat go guldalit».
NRK P3 addá «Ondt Blod» jovkui viđeža birccus ođđa skearru ovddas, ja dan seamma bircologu leat iTromsø, Dagbladet ja Panorama addán Finnmárkku jovkui.
Joavku čuojaha Oslos John Dee báikkis gaskavahkku ođđajagemánu 20. beaivvi eahkedis.
