Nu leaikkastallá Gjensidige gulahallanhoavda Arne Voll ja muittuha ahte olu vázzit vuojáhallet seavdnjadin. Šelggon sáhttá leat erohus jápmimis ja eallimis.
Sotnabeaivi, golggotmánu 31. beaivi, lea Hállemas dahje eŋgelasgillii «Halloween». Dalle leat olu mánát jođus geainnuid alde, eai dušše baldit kránnjá, muhto olu biilavuoddjit healkkehit maid.
Maŋimuš jagi leamašan máŋgačuođi johtolatbártti go vázzi lea vuojáhallan. Olles 95 proseantta daid olbmuin eai geavahan šelggona.
– Čáhppes gopmebiktasat ja šelggona haga lea measta veadjemeahttun biilavuoddjái fuomášit mánáid, ii geaidnočuovggas ge, lohká dáhkádusfitnodaga Gjensidige gulahallanhoavda Arne Voll.
Son ávžžuha biilavuoddjiid leat velá eanet áicevažžan dan eahkeda. Vaikko mánná oaidná biilla, de ii álo biilavuoddji oainne máná.
– Go mánáid garvvohat, darvvit maid šelggona biktasiidda, čuovgi «glowsticks» dahje goarus šelggona gitta biktasii. Veaháš hutkáivuođain sáhttá šaddat somás bivttas maid mánná mielas coggá ala, lohká Voll.
Son lohká olusiin leat iešguđetlágan šelggonat vurkejuvvon lođáin ja skáhpain, eaige leat masage ávkin. Jus lea liige šelggon, atte mánnái dan oktan njálgáiguin vai mánás lea oadjebas ja somás Hállemas.
