Finnmárkku eanansuodjalus hárjehallá suodjalit Norgga Finnmárkkus. Hárjehus lea ožžon nama Winter Wolf, ja loahpahuvvo njukčamánu 25. beaivvi.
Váldohárjehallamat leat Iŋggašguolbanis ja dakko birrasis. Hárjehallamat leat oktanaga eará militeara doaimmain iešguđetge sajiin fylkkas. Dat oassi mii hárjehallamis sáhttá guoskat olbmuide, dat álggahuvvo lávvordaga njukčamánu 19. beaivvi, dieđiha oberst Tomas Beck.
– Olgoriikapolitihka dilálašvuođa oktavuođas, de soaitá leat gažaldat manin mii hárjehallat. Ferten de muittuhit ahte Finnmárkku eanansuodjalus, ja maiddái Norgga suodjalus, lea defensiivvat ásahuvvon, dadjá Beck.
Hárjehallamat dáhpáhuvvet oktanaga Nato-hárjehusain, Cold Respons, muhto ii leat seamma guovlluin ii ge leat guoskevaš dasa.
(©NTB)
