Dákkár lea 5 000 kubihkkamehtera dimbbar olggosoaidnit go áimmus govve dan. Finnmárkkuopmodagas (FeFo) lea dál badjel 11 000 kubihkamehtera dimbbar Báhčaveajis, Kárášjogas ja Álttás mii galgá geavahuvvot gáiddusliekkasin. GEAHČA VIDEO:
Dákkár lea 5 000 kubihkkamehtera dimbbar olggosoaidnit go áimmus govve dan. Finnmárkkuopmodagas (FeFo) lea dál badjel 11 000 kubihkamehtera dimbbar Báhčaveajis, Kárášjogas ja Álttás mii galgá geavahuvvot gáiddusliekkasin. GEAHČA VIDEO:
Finnmárkku vuvddiid dimbarat galget olusiid ligget dáppe davvin boahtte dálvvi. Finnmárkkuopmodaga FeFo preassavideos oainnát makkárat dimbarat leat olggosoaidnit go áimmus daid filbme.
Njáskan veahá liiggás
Dimbbar mii loktejuvvo trailerii, galgá ligget Mátta-Várjjaga Garnisovnna.
Dáid lea báikkálaš fitnodat Pasvik Biovarme AS njáskan, geat seammás maiddái čullet sahádimbariid báikkálaš sahenrusttegiidda.
Nuvvosguolbanis Mátta-Várjjagis buktá ges Norsk Biobrensel AS, mainna FeFos lea šiehtadus, ges sahájáffuid Bioenergy AS fitnodahkii mii buvttada liegga čázi ja lieggasa.
Šiehtadus dahkkui golggotmánus diibmá, ja jahkásaččat geavahit sii birrasii 4 000 kubihkkamehtera dimbara.
– Mii leat njáskan veahá liiggás. Dan áigut dahkat 15 jagi, lohká Ole Andre Hestmo, guhte lea FeFo vuovdehálddašeaddji.
58 guorpmi Kárášjogas Supmii
Olu dimbbar Báhčaveaji, Kárášjoga ja Álttá vuvddiin leat dán geasi sáddejuvvon bioliggenrusttegiidda.
Skillemo industriijaguovllus Álttás, lea báikkálaš aktevra Arctic Bio As, njáskan FeFo ovddas.
Dát dimbarat fievrreduvvojit fatnasiiguin Norsk Biobrenselii.
Dasa lassin lea olles dimbbarvuorká Kárášjogas vuvdon suoma Inergia Lämpö fitnodahkii, mii buvttada sahájáffuid bioenergiijarusttegii Anáris.
Dát fievrreduvvojit Gáregasnjárgga duollostašuvnna bokte guorbmebiillaiguin, ja leat plánejuvvon 58 fievrredeami dán čavčča.
– Dát dáhpáhuvvá maŋŋil go Kárášjoga bioenergiijarusttet lea bissehuvvon, lohká ealáhushoavda Kate Persen.
(Ášši joatká gova vuolábealde)
Preassagovva: FeFo
Mo vuvddiin go ná njásket?
– Vai vuvddiin šaddá buorre kvalitehta de ferte daid njárbet dál. Ovdal go njáskagoahtit de leat birrasii 160 muora juohke dekáras, vuosttaš njárbemis čuollat birrasii 50 muora juohke dekáras. Go vuovdi lea fas šaddan birrasii jagi geahčen, de berrejit leat birrasii 60 muora juohke dekáras, dan mađe gierdá eanan. Go dál njáskat vuvddiid, de lea vuovddis olu buoret kvalitehta 40 jagi geahčen, go jus eat lean dál njáskat, lohká Ole Andre Hestmo.
Okta dekára lea 1 000 njealjádasmehtera.
Sáhttet šaddat eambbo doaimmat
Hestmo lohká maid sávvat ahte Finnmárkku dimbarat sáhttet dagahit vel eambbo báikkálaš bargosajiid boahtteáiggis.
– Mii oastit bálvalusaid vai sáhttit dahkat dan maid dahkat, nu ahte leat jo oalle máŋggas barggus vuvddiin. Statskog doaimmahii Báhčaveaji vuovddi 1993 rádjái, veahá árabut Oarje-Finnmárkkus. Nu háhkat mii gealbbu Finnmárkkus hálddašit vuvddiid. Boahtteáiggis sáhttet šaddat eanet doaimmat, eai soaitte njáskama oktavuođas, muhto daid viidásat buvttadeamis. Dat lassána dađi mielde go vuovddit šaddet boarráseabbon. Lea sáhka stuorra árvvuin boahtteáiggis, lohká son.
