Finnmárkku buohcciviessu jienastuvvui ovttajienalaččat almmolaš oahppokantuvran.
Miessemánu 29. beaivvi dohkkehii Finnmárkku fylkkagielda Finnmárkku buohcciviesu almmolaččat oahppokantuvran.
Mearrádus lei ovttajienalaš.
Finnmárkku buohcciviesu oahppokantuvrras galget álggos golbma miellahttofitnodaga; klinihkat mat gullet Hámmárfestii, Girkonjárgii ja Prehospitála bálvalussii.
Ovttas galget dát sihkkarastit fágagelbbolašvuođa rekrutterema.
– Mihttun mis lea ahte galget oahpahallit juohke klinihkas juohke báikkis, dadjá Finnmárkku buohcciviesu oahpahalliidkoordináhtor, Grethe Ernø Johansen preassadieđáhusas.
Mii lea oahppokantuvra?
Oahppokantuvra lea ásahus fitnodagaide mat ovttasbarget oahpahit oahpahalliid.
Oahppokantuvrra váldobargu lea bargat iežaset fágaid rekrutteremiin, ja čuovvut iežaset oahpahalliid vai sidjiide fállo dat oahppu maid galget oažžut.
Finnmárkku buohcciviesus leat máŋggaid jagiid leamaš oahpahallit buohcceviesuin ja ambulánssain ja leat olu ohccit juohke giđa.
Buot oahpahallit, geat leat váldán fágareivve, leat ceavzán.
– Dál mis leat 27 oahpahalli dearvvašvuođafágas ja ambulánsafágas ja 17 ođđa álget čakčamánu, muitala Johansen.
Olu ovdamunit
– Mii dárbbahit oahpahalliid jus galgat nagodit rekrutteret ođđa fágaolbmuid.
Ulbmil oahppokantuvrrain lea sihkkarastit Finnmárkku buohccivissui doarvái oahpahalliid ja áimmahuššat oahpahallái oktagaslaš oahppodárbbuid, joatká son.
Oahppokantuvra galgá koordineret ja kvalitehtasihkkarastit oahpahalliid barggu geain lea šiehtadus Finnmárkku buohcciviesuin.
Oahppokantuvra galgá bargat rekrutteremiin, jearahallat ja virgádit ovttasráđiid ossodagaiguin, ja čuovvut juohke oahpahalli vai sii ožžot dan oahpu man galget oažžut.
– Ovdamunni sierra oahppokantuvrrain lea ahte buot doarjagat mannet midjiide, nu ahte sáhttit ovddidit kvalitehta oahppoáiggis. Dát boahtá maid buorrin ossodagaide, go de manná oassi doarjagis sidjiide. Sii váldet oahpahalli iežaset soaji vuollái ja olles ossodat lea veahkeheamen ovddidit ja veahkehit oahpahalli.
– Dasa lassin beassat čuovvut oahpahalliid vel dárkileappot. Oahppoáiggis lea mis ságastallan oahpahalliiguin juohke guđat mánu, seammás go fágalaš jođiheaddji oahppokantuvrras čuovvu su bargobihtáid ja hospiterema ektui, ja muđui ságastallá jus lea dárbu, loahpaha Johansen.
