Internášunála sámi filbmaguovddážii lea válljejuvvon ođđa stivrajođiheaddji. Dál sávvá direktora iežaset ain eambbo ahtanuššat.
Internášunála sámi filbmaguovddážii lea válljejuvvon ođđa stivrajođiheaddji. Dál sávvá direktora iežaset ain eambbo ahtanuššat.
Internašunála Sámi filbmainstituhta (ISFI) generálačoahkkin ja eaiggádat, Sámediggi ja Guovdageainnu suohkan, leat nammadan Ulf Tore Isaksen ođđa stivrrajođiheaddjin instituhttii. Son boahtá de ovddeš jođiheaddji Ann Jorid Henriksena sadjái.
Nanu duogáš
ISFI preassadieđus čállet ahte Isaksenis lea nanu duogáš sihke politihkas ja báŋkosuorggis. Son lea dál barggus Seastinbáŋku Davvi Norggas ja lea maid leamaš stivrrajođiheaddji Davvi-Norgga Filbmaguovddážis ja Finnmárkku kulturealáhusfoanddas.
– ISFI bealis leat hui movttegat go leat ožžon Ulf Tore Isaksena fárrui ja mii illudit ovttasbargui, čállá filbmainstituhta direktevra Anne Lajla Utsi.
Ođđa stivra
Dasa lassin leat dát válljejuvvon stivrii.
Gunn Britt Retter, Unjárga
Oskar Østergren Tärnaby, Ruoŧŧa
Marja Bål Nango, Máze
Guovdageainnu suohkana stivrramiellahttu Jan Ole Buljo joatká vel jagi stivrra nubbinjođiheaddjin.
Eambbo doarjjavejolašvuođat
Internašunála Sámi Filbmainstituhtas lohket leat gelddolaš áiggi dál, erenoamážit go lea rahppon vejolašvuohta oažžut doarjaga neaktinfilmmaide.
– ISFI lea dál oččodeame davviriikkalaš organisereme ja eaiggátvuođa, go stuorámus hástalus lea oažžut bistevaš ruhtadeami ja doaimma. ISFI lea váldon áššin Davviriikkalaš ráđđái, gos mearridit ášši golggotmánus dán jagi.
Fáhkka sturron hirbmadit
Preassadieđáhusas čállá Utsi ahte dalle go ásahuvvoje 2009:s, lei 1,8 miljovnna ruvnno doarjja Kulturdepartemeanttas. Dan ráješ leat sin doaimmat ja maiddái ruhtadeapmi sturron. Jagis 2014 lei doarjja 7,7 miljovnna.
– Dat lassáneapmi čájeha ahte sámi filbmasuorgi lea fáhkka sturron hirbmadit. Lagamus jagit šaddet hirbmat dehálaččat ja ođđa stivrrain leat mis buorit eavttut lihkostuvvat šaddat dehálaš aktevran sámi filmmaid ja TV-ráidduid ráhkadeamis. ISFI illuda bargat viidáseappot ođđa stivrrain, mas lea nanu gelbbolašvuohta máŋgga suorggis, čállá Anne Lajla Utsi.