Miessemánu 4. beaivvi válljejuvvui ođđa stivrajođiheaddji Riddu Riđđu festiválii.
Miessemánu 4. beaivvi válljejuvvui ođđa stivrajođiheaddji Riddu Riđđu festiválii.
Bente Ovedie Skogvang lea 56 jagi boaris ja lea Olmmáivákkis eret.
Son orru Elverumas, ja sus lea doavttergráda Norgga valáštallanallaskuvllas ja bargá vuosttašamanueansan Innlandet allaskuvlla Valáštallan- ja lášmmohallaninstituhta álbmotdearvvašvuođafágaid ossodagas, čállá Riddu Riđđu preassadieđáhusas.
FIFA-duopmár
Skogvang lei spábbačiekčanduopmár riikkaidgaskasaš dásis 20 jagi.
Son lea FIFA-duopmár ja lei vuosttaš nisu máilmmis guhte lea dubmen OG-finála, mii dáhpáhuvai 1996:s.
Máŋga jagi leamašan eaktodáhtolažžan festiválas
Skogvang lea doaibman eaktodáhtolažžan Riddu Riđus máŋga jagi, ja maŋimus jagiid lea jođihan mánáidfestivála.
Skogvang jođiha «Identitetsbygging og fellesskap gjennom friluftsliv, idrett og fysisk aktivitet på Riddu Riđđu festivalen» dutkanprošeavtta, mas lihkadeapmi sápmelaččaid ja eamiálbmogiid gaskkas lea guovddážis.
– Mun illudan sakka álgit stivrajođiheaddjin ná dehálaš ja liekkus festiválii, mii lea mearkkašan ja ain mearkkaša nu olu munnje ja olu eará eamiálbmogiidda miehtá máilmmi. Riddu Riđus leat čeahpes bargit ja badjel 200 eaktodáhtolačča geaiguin illudan ovttasbargat. Gárttan váillahit bargat Riddu váimmuin; Mánáidfestiválain, muhto prográmma lea goasii jo gárvvis ja sávan ođđa čeahpes olbmot váldet dan hoidema badjelasaset, dadjá Skogvang preassadieđáhusas.
Illudit joatkagii
Bente Skogvang váldá ámmáha badjelassii Christina Henriksen maŋis, guhte lea leamašan dán ámmáhis 2015 rájes.
Riddu Riđu hálddahuslaš jođiheaddji Magne Wilhelmsen lohká:
– Stuorra giitevašvuođain giitit mii Christina njealji jagi doaimma ovddas. Dál illudat Bentiin joatkit festivála ovdánahttimiin.