Fiertu, mokta ja alla leaktu!

Mannan sotnabeaivvi Máze ja Álttá ­valáštallansearvvi ovttasbarggus 51. geardde lágiduvvui 28 km guhku čuoigangilvu man namma lea Beaskáđasčuoigan. Ávvir dán háve ii dušše finadan gullat ságaid, muhto ­maiddái searvat čuoiganmátkái.

Sotnabeaivvi árra iđida, diibmu gávccis, vulggii busse Guovdageainnu Statoil bensiidnastašuvnna luhtte Suolovuopmái gos lei čuoigama vuolgga.

Ovcci olbmo dollejedje busse mielde dohko. Beaivváš báitá. Fiertu.

 – Ovcci buolašgráda juste dál, dadjá bussevuoddji Nils Mathis Eira.

Muđui ge organiserejuvvon bussefálaldagat Álttás daidda geat áigo Beaskáđasčuoigamiidda.

Nu ollu oktanaga lágidit

Bussemátkkis beasai ge Ávvira journalista gullat ollu čuoiganfearániid.

Ávvira journalista jearaha manne ná unnán olbmot leat vuolgán mielde.

 – Juo, maŋimuš áiggiid eai beare gallis leat vuolgán dáppe Guovdageainnus. Ovdalaš áiggiid lávii vel stuorát busse, ja lei áibbas dievva, muitala Julie Eira.

Muhto iežas ii loga sáhttit diehtit bures mii lea sivvan. Árvaladdá beare:

 – Na, go mii lágideimmet Saami Ski Race, de seamma áiggi ledje eará čuoigamat mat vissa geasuhedje čuigiid.

Gullo de Morten Skum dadjame:

 – Gal dat lea buorre rekláma leamaš Guovdageidnui go Petter Eliassen čuoiggai Saami Ski Race dán jagi maid!

 – Nu lea ge, soames vástida.

Petter Eliassen lei ge mielde dán jagáš Beaskáđasčuoigamiid gilvoluohkás.

– Oainnán serve eambbo go diibmá

Beaskáđasčuoigamiin leat guokte luohká, lášmmohallan ja gilvu. Lášmmohallanluohká čuoigit vulget dalle go ieža mearridit. Dán jagi lei ođas ahte olbmuin lei vejolaš vuolgit tuvramátkái jo bearjadaga ja ollet mollii, mii lea Gargias lahka Álttá, easka sotnabeaivvi.

    –  Gullen unnán čuoigit servet?

 – Juo, gilvočuoigit gal leat unnon maŋimuš guovtti jagis, muhto tuvraluohkás oainnán eambbosat servet go diibmá. Dat bohtet ja bohtet, muitala čujuhettiin čuigiid registrerenbáikái Beaskáđasčuoigamiid jođiheaddji Máze bealis, Tore Turi.

Tuvraluohkkái serve oktiibuot dán jagi 360 čuoigi. Gilvoluohkkái serve

45 gilvočuoigi. Ávvira journalista lei okta dáin.

– Petter Eliassen, dieđusge!

Ovdalaš vuolgaga fuobmájin ge seainnis čuigiidlisttu. Letne vel Petter Eliasseniin seamma ahkásaččaid joavkkus. Čujuhan munno namaide dan báhpáris ja jearan Tore Turis gean tihppe vuoitit.

 – Na Petter Eliassen, dieđusge! Eahpitkeahttá, mojiin vástida.

Oallugat ovddalgihtii dadje ge ahte Eliassen galgá dán jagi vuoitit, nu mo diibmá ge dagai.

Petter Eliassen vuittii. Čuoiggai 28 km distánssa 54 minuhtas 35 sekunddas. Ávvira journalista ádjánii diimmu, 16 minuhta ja 53 sekundda ja oktiibuot šattai 30:din.

Beare guokte nieida searvvaiga gilvočuoigamiidda. Ida Olivia Midthun Dalen olahii buoremus áiggi – 1 diimmu, 9 minuhta ja 26 sekundda. Benedikte Elise Dahl čuoiggai diimmu, 11 minuhta ja 48 sekundda.  

Dás oainnát bohtosiid.

– Dál čuoigat buorebut go diibmá

Guovdageaidnulaš Nils Mathis Sara lea searvan daidda čuoigamiidda jo 42 geardde, ja son vástida mii geasuha su:

 – Hui suohtas, ollu olbmuid oaidná. Mihttomeriid bidjat ahte dál čuoigat buorebut go diibmá, ja de maŋŋel ságastallat boares oahppásiiguin makkár mihttomearit sis leat. Go gávnnadit doppe Gargias, de geahččat doalai go mihtomearri.