Dán jagi juolluda ráđđehus 70 miljovnna ruvnno fidnofágaide vai nannejit oahpposajiid fylkkain.
Máhttoministtar Torbjørn Røe Isaksen dieđiha preassadieđáhusas ahte Ráđđehus dieđiha ruhtalassáneami fidnofágaide.
– Ruhta galgá earret eará mannat fitnodagaid oahpposajiid nannemiidda, nannet fidnofágaoahpaheddjiid guossástaddanortnega, ja lasihit 638 oahpposaji fágaskuvllain, muitala Røe Isaksen preassadieđáhusas.
Bargguhisvuohta ii leat nu badjin
Bargguhisvuohta fidnofágabargiin ii leat nu allat, ja bálká lea buorre.
– Norggas leat fidnobargit máilmmidásis. Dan lea Norgga fidnofágariikkajoavku čájehan, go leat vuoitán ollu medáljaid Fidnofágamáilmmimeašttir gilvvuin maŋemus jagiid. Manná maid rievttes guvlui oahpposajiid ásaheamis, go Oahppodirektoráhtta čájeha ahte oahppit leat ožžon oahpposajiid 2017:s, eanet go jagi ovdal, lohká máhttoministtar.