Árbevierut ja identitehta lei dáiddalaš fáddán dán jagi festiválas. Nuorra eamiálbmotdáiddárat iešguđetlágan surggiin besse čájehit iežaset čehppodaga Riddu Riđu festiválas man váile 7000 festiválaguossi besse vásihit.
Guossit lassánan diimmá ektui
Oktiibuot gallededje 6853 guossi festivála muitala festiválajođiheaddji Karoline Trollvik Ávvirii.
Dát lea 6,3 proseantta lassáneapmi diimmá loguid ektui čállá Riddu Riđđu preassadieđáhusastis.
Riddu Riđđu lea eamiálbmotfestivála mii dán jagi lágiduvvui 27.geardde.
Olmmáivákkis Gáivuona suohkanis duorastagas sotnabeaivái.
Duodjeárbi oidnosis
Prošeavtta “Duodji Dreamers” bokte leat 10 nuorra duojára dujiideaset bokte čalmmustahttán muitalusaid Sámis.
Guovddáš gažaldagat maid prošeavtta olis galge suokkardit ledje man dovddus sadji duojis sáhttá leat boahtteáiggis, mo duoji sáhttá ovdánahttit ja geas galgá leat riekti ovdánahttit duoji.
Čohkkejuvvon Nordland-nammasaš fatnasat ledje oaidnin ládje festiválavahkkus.
Fatnasat leat addán ođđa máhtu mearrasámi fanashuksenárbevieruin.
– Olles Sápmi čalmmustuvvui
Riddu Riđđu čállá viidáseappot preassadieđáhusastis ahte olles Sápmi lea leamaš oidnosis festiválas ja ahte prográmma guovdilastá oppa Sámi.
Earret eará namuhit preassadieđáhusas ahte festiválamannit leat beassan dovddiidit gieldda- ja nuortalaš sámiid dilálašvuhtii ja muđuid makkár árbevierut sis leat.
– Leamaš fiinna dálki ja olbmuin lea leamaš buorre mokta, čállá Riddu Riđu festiválajođiheaddji Karoline Trollvik preassadieđáhusas.
Festiválajođiheaddji mieđiiha iežas leat váiban maŋŋel festivála, muhto dadjá iežas leat lihkolaš go lea nu erenomáš duhtavaš dáinna festiválain mii lea dat maŋemuš festivála maid jođiha. Son rámida čájáhusa man UiT – Norgga Árktalaš Universitehta lei diŋgon Mari Boines UiT 50 jagi ávvudeami oktavuođas.
Boine čájáhus “Forstår vi hverandre?”, mii lei earenoamážit diŋgojuvvon dáidda doaluide, čájehuvvui guovtte geardde bearjadaga.Goappáš beivviid vuvde buot bileahtaid sámi beakkálmasa čájáhussii.
– Čájáhus lei nanu ja jurdda bohciidahtii čájáhus ovtta sámi deháleamos jienain, dadjá festiválajođiheaddji Karoline Trollvik.
Kulturministtar rabai festivála
Norgga kulturministtar Trine Skei Grande dajai sártnistis ahte Riddu Riđu festiválas lea stuora mearkkašupmi sátnefriddjavuhtii ja ovddida kultuvrralaš máŋggabealatvuođa. Grande dajai ahte dát festivála lea báiki gos fievrridit ja ovdánahttit árbevieruid.
Dán jagi nuorra dáiddár
Festivála nuorra dáiddár dán jagi lei Ánná Káisá Partapuoli. Son beasai čájáhallat iežas dan nu gohčoduvvon “slampoesiija” bokte. Dasa lassin lei Partapuoli ovttas earáiguin mielde gudnijahtteme Áillohačča.
Gudnijahtte Áillohačča
Multidáiddár Nils-Aslak Valkeapää rohkki, Áillohaš, livččii dán jagi deavdán 75 jagi. Dán oktavuođas lei Lásságámmi-vuođđudus
ovttas Romssa girjerádjosiin ja Riddu Riđu festiválain bovden njealje sámi dáiddára ja artistta Unnalávdái sihke ovdanbuktit iežaset divttaid ja háleštit Áillohačča mearkkašumi birra.
Nubat Ánná Káisá Partapuoli, Synnøve Persen, Niko Valkeapää ja Niillas Holmberg gudnijahtte Áillohačča festivála lávddis, čállá Riddu Riđđu ruovttusiiddustis.
Giitevaš festiválajođiheaddji
– Lean giitevaš go lean beassan bargat nu ollu fiinna olbmuiguin geaiguin lean beassan ovttasbargat maŋemuš jagiid, čállá Trollvik preassadieđáhusastis.
Trollvik čállá ahte illuda oaidnit mo festivála ovdána ovddosguvlui ođđa festiválajođiheddjiin Sandra Márjá West jođihemiin.
