Birrasii vahkku ovdal go Tråantes álget stuora ávvudoalut, de lágiduvvo Sámi Musihkka Vahkku Álttás. Dál leat sii pláneme ođđa bálkkašumi, muhto lea ain čiegus ášši makkár bálkkašupmi dat lea.
Birrasii vahkku ovdal go Tråantes álget stuora ávvudoalut, de lágiduvvo Sámi Musihkka Vahkku Álttás. Dál leat sii pláneme ođđa bálkkašumi, muhto lea ain čiegus ášši makkár bálkkašupmi dat lea.
Sámi Musihkka Vahkku lágida doaluid vahkku ovdal Tråante ávvudoaluid, ja lea sin oassi dan stuora 100 jagi ávvudeamis maid lágidit Álttás.
Vuosttaš almmuhuvvon artista gii čuojaha City Scenes, Álttás, dan vuosttaš vahkkoloahpa guovvamánus lea jagi 2016 radiolávlaga vuoiti, Felgen Orkester.
Hástalusat fylkkagielddas
Klemet Anders Buljo, gii lea okta lágideddjiin, ii loga artistaváni dan vahkkoloahpa. Son muitala ahte lea hui vuogas áigodat čohkket musihkkariid ná árrat jagis, ja soitet maid ođđa skearrut maid muhtimat almmuhit álggus jagis.
– Stuorámus hástalus lea go nu árrat jagis lágidit dáid doaluid. Leat máŋggat festiválat maidda lea hástalus go fylkkagielda ii meannut ruhtadoarjjaáššiid ovdal go njukčamánus. Sámi Musihkka Vahkku bealis lea buorre go Sámedikki bušeahtas leat fásta doarjagat, muhto gártá váttisin go mis leat jo leamašan doalut ovdal go fylkkagielda meannuda ohcamiid, muitala Buljo.
Ođđa bálkkašupmi
Sámi Musihkka Vahkku leat pláneme ođđa bálkkašumi ásahit, muhto Buljo ii muital nu ollu dan birra. Bálkkašumi namma lea maid čiegus ain.
– Lea vuos beare árrat nu ollu muitalit, muhto mii leat ásaheame ođđa bálkkašumi man geiget Sámi Musihkka Vahkkus guovvamánus. Dat lea stuora bálkkašupmi, ja mii leat ain bargame dainna, muitala Klemet Anders Buljo.
Sámi Musihkka Vahkku almmuha prográmma boahtte jagi álggus, ja ovdanbuktá ođđa innovatiiva lahkoneami sámi kultuvrii mas luondduriggodat ja árbediehtu galget leat guovddážis. Doaluid sisdoallu lea movttiidahtti musihkka, dáidda, doaimmat ja máistovásáhusmátki Sámis.
