Stáda geaidnodoaimmahagas galget oahppat eanet seksuála duogážiid birra ja movt searvái váldit earáid.
Stáda geaidnodoaimmahagas galget oahppat eanet seksuála duogážiid birra ja movt searvái váldit earáid.
Stáda geaidnodoaimmahat sávvá iežas neahttasiiddus lihku «Oslo Pride» doaluide mat lágiduvvojit dán vahkku ja nohket sotnabeaivvi geassemánu 26. beaivvi. Stáda geaidnodoaimmahat almmuha ahte áigu oahpahit iežas jođiheddjiide seksuála duogážiid birra ja movt dohkkehit ja váldit vára earáin.
– Servvodagas ja bargoeallimis ferte sadji buohkaide ja dat lea dehálaš, dadjá Stáda geaidnodoaimmahaga HR-direktevra Vidar Lødrup.
Loktejit etáhta máhtu
– Mii háliidit loktet máhtu ja ovdánahttit buriid miellaguottuid Stáda geaidnodoaimmahagas, ja fállat earret eará «Rosa kompetanse» kurssa, muitala Lødrup.
– Kurssas oahppá movt galgá láhttet sihke dorvvolaččat ja searvái váldit earáid beroškeahttá seksuála duogážis ja sohkabealiidentitehtas. Dainna lágiin sáhttet bargit leat eanet profešuneallat ja searvái váldit eará bargiid, joatká Lødrup.
Kurssa lágideamis lea lesbaid, homofiillaid, bifiillaid ja tránssaolbmuid riikasearvi mielde čađaheame máhttoloktema.
Dán jagi rájes lea bággu dakkár oahpu čađahit Stáda geaidnodoaimmahagas. Kursa lea jođiheddjiide, ii ge leat šat dušše eaktodáhtu mielde fálaldat, čállá Stáda geaidnodoaimmahat.
