– Fertejin váldit bottu

Váldodoaimmaheaddji Pirita Näkkäläjärvi dovddasta ja duođašta ahte muhtin lea čuoččuhan Yle Sámi ja su leamaš oassesivalažžan muhtin olbmo jápmimii.

– Mu ožžon čállosa iežan bargo e-poasta čujuhussii ovtta evttohasas Sámedikkeválggaid áigge. Dat lea hui čehpet čállon ja das ii njuolgga daddjo ahte mun dahje Yle Sápmi livččiimet jápmimii sivalaččat, muhto dat čielgasit geažuhuvvo nu. Ahte mu ja min doaimmat leat dagahan dan, muitala Näkkäläjärvi vuollegaš jienain, mii gullo doarggisteamen.

Dovddai bures

Näkkäläjärvi muitala iežas dovdan dán olbmo gii jámii, dasa lassin lei lagašolmmoš su bearrašii ja leige erenomáš lossat gullat dákkár čuoččuhusaid.

– Son jámii guhkes buozalmasvuođa geažil ja mun vásihin dien čuoččuhusa roavisin ja čuozai munnje hui garrasit, go dát olmmoš, gean dovden bures lei aiddo jápmán, čilge son.

Atná unohassan

Dasa lassin atná váldodoaimmaheaddji hui unohassan riikkabeaiáiras Mikko Kärnä čállinvuogi earet eará iežas bloggas ja maiddái sosiála mediain.

– Munhan in leat áidna gean birra son čállá. Mun vásihan dan nu ahte, go riikkabeaiáirras čállá, de muhtin láhkai addá lobi maiddái earáide cielahit. Persovnnalaš cielaheapmi orro su vuohki ságastallat, oaivvilda Näkkäläjärvi.

Viimmat duosttai rahpasit

Pirita Näkkäläjärvi ii leat hállan almmolaččat man lossadit son lea váldán neahttavealaheami ja man garrasit dat lea čuohcan sutnje. Moatti vahkku áigi son mearridii rahpasit dan birra iežas «facebook» skihpáriidda.

– Mun viimmat dusten muitalit ahte man garrasit neahtačálašeapmi lea munnje čuohcan. Maŋŋel go dearvvašmuvven min barggu sisáimmu dagahan váttuiguin, de jotken buohcciluomu dan sivas go fertejin váldit bottu, go ledjen nu váiban dán geažil, muitala son.

Álggu rájes vásihan

Näkkäläjärvi dadjá iežas vásihišgoahtán neahtavealaheami ja čálašeami jo ovdal vuosttaš bargobeaivvi ja dalán go válljejuvvui Yle Sámi váldodoaimmaheaddjin ja lohká joatkašuvvan oalle dávjá das rájes.

– Mun oktageardánit in šat nákcen bargat, inge dovdan iežan leat buorre hoavdan iežan bargiide. In nagodan sin šat doarjut, go mus alddes lei nu fuones dilli, dovddasta son.

Pirita Näkkäläjärvi deattuha goittot ahte liiko go olbmot ovdanbuktet áššálaš cuiggodemiid su barggu oktavuođas. Daningo dat ovddida Yle Sámi doaimmaid.

Oažžu issorasat doarjaga

Maŋŋel go Näkkäläjärvi rahpasii neahtavealaheami birra «Facebook» neahttasiiddus, de lea ožžon ollu doarjaga miehtá riikka.

Earet eará leat searvvit ja maiddái ovttaskas olbmot čállán ja vuolláičállán oktasaš cealkámuša doarjun dihte váldodoaimmaheaddji, man Janne Saijets almmuhii iežas «Facebook» siiddus, ja man Saijets vuosttažin vuolláičálii.. Sii dáhttot vaššičállosiid nohkat dalánaga. Čállosa loahppa lea sámegillii, dan sáhtát lohkat dás:

Váttis diehtit ulbmila

Cealkámušas boahtá ovdan earet eará, ahte ulbmiliin neahttavealaheamis lea jávohuhttit sihke váldodoaimmaheaddji ja olles Yle Sámi. Ieš váldodoaimmaheaddji goittot lohká váttisin diehtit ulbmila.

– Vuolláičállit leat cealkán nu, muhto mun in máhtte árvvoštallat ahte leago nu. Lea váttis diehttit man systemáhtalaččat cielaheapmi lea geavvan ja man olusat leat čállán. Muhtimin doppe leat njuolga fállehan mu dahje leat boasttu čuoččuhusat mu barggu ektui, maid mun láven bivdit njulget. Muhto lea váttis čuovvut visot, dovddasta son.

Ii vuollán

Vaikko Pirita Näkkäläjärvi leage vásihan garra dálkkiid dan rájes go nammaduvvui váldodoaimmaheaddjin, de ii leat son jurddašan vuollánit. Son lohka máhccat fas gievrrabun bargui ođđajagi maŋŋá, go geargá buohcceluomuin ja illuda dasa.

(Ášši joatká gova vuolábealde)

Ii oaivvil cielahan

Riikkabeaiáirras Mikko Kärnä, guhte lea okta dáin geaid Näkkäläjärvi oaivvilda unohassat čállán su birra, lohká iežas vuostálastit buot lágan givssideami ja vealaheami, iige oaivvil iežas cielahan Pirita Näkkäläjärvi.

– Jus olmmoš doaibmá almmolaš virggis, de ferte ráhkkanit vástidit cuiggodemiide ja čađahit áššálaš digaštallama. Pirita galgá beare váldit muinna oktavuođa, jus dovdá ahte lean boasttu dieđuid čállán. Mun lean álo gearggus vástidit, dadjá son.

Kärnä lea oaidnán vuolláičállon cealkámuša ja su mielas lea šállošahtti ahte Näkkäläjärvi vásiha dákkár dili ja lea dan dihte buohccindieđihuvvon.

– Lea dieđus veahá váttis áddet makkár čállosiidda cealkámušas čujuhit ja maid sii oaivvildit leat vaššisáhkan, loahpaha son.