-Almmuhus-
OĐĐASAT– Ferte oažžut lobi suddjet iežaset elliid

– Ferte oažžut lobi suddjet iežaset elliid

-

-

– Ii leat dohkálaš ahte sáhttá geavvat giddagassii jus ferte gáhttet iežas elliid vai boraspiriide eai gottáhala, lohká nuortaguovllu válgabiire NSR-SáB nubbi kandidáhtta Jovna Vars Smuk.

Nuortaguovllu válgabires gáibideaba Norgga Sámiid Riikkasearvi (NSR) ja Sámeálbmot Bellodat (SáB) ahte boraspiriid unnidanvuoigatvuohta gieđahallo ollislaččat.

 

Falleheamis ii olle hehttet

NSR-SáB vuosttaš ja nubbi kandidáhtat oaivvildeaba ahte láhka ja vuoigatvuohta ferte nannejuvvot vai boazoeaiggádis ja boanddas lea vejolašvuohta suddjet elliid boraspiriid ja goaskimiid vuostá.

– Heahtedili vuoigatvuohta ii doaimma, muitala Márjá-Liissá Partapuoli preassadieđáhusas ja joatká:

– Dál lea vuoigatvuohta báhčit boraspire juste de go njuolgut falleha ealli. Mii oaivvildit ahte dát lea beare gáržžes čilgehus. Duohtavuođas ii nagot bissehit goaskima juste dalle go falleheapmi álgá. Dain dilálašvuođain ii leat álki ollet heahtevuoigatvuođa váldit atnui, ja ulbmil dan vuoigatvuođas ii doaimma, lohká Partapuoli.


NSR-SáB vuosttaš ja nubbi kandidáhtat, Márjá-Liissá Partapuoli ja Jovna Vars Smuk. Preassagovva.

 

Čuovvolit ášši maŋŋel válggaid

Jovna Vars Smuk, gii ieš lea boazoeaiggát, gáibida ahte heahtevuoigatvuođa ášši gieđahallo vuđolaččat.

– Mii áigut čuovvolit dán ášši Sámedikkis maŋŋel sámediggeválggaid, lohká Smuk, geas lea jáhkku ahte sihke son ja Partapuoli lea Sámedikkis maŋŋel válggaid.

-Almmuhus-