Árja dáhttu Sámedikki hábmet sierra doaibmaplána sámi vuoraolbmuide. Sámediggeráđđi Henrik Olsen lea mielas muhto lohká dán leat ruđa ja resurssaid duohken.
Árja dáhttu Sámedikki hábmet sierra doaibmaplána sámi vuoraolbmuide. Sámediggeráđđi Henrik Olsen lea mielas muhto lohká dán leat ruđa ja resurssaid duohken.
– Vuorasolbmuid áššit lea okta dain buot deháleamos politihkalaš surggiin Sámedikkis, muhto dat ii oidno vuoruhemiid ektui nu bures. Mii leat ásahan gal sámedikki vuorrasiidráđi ja dat lea hui buorre muhto sis fertejit leat doarvái resurssat bargat áššiiguin ja sii fertejit maid oažžut dan vejolašvuođa ahte váikkuhit eambbo go mii dál lea dilli, lohká Árjja Laila Susanne Vars.
Sámedikki dievasčoahkkimis gohčui Árja Sámedikki hábmet sierra doaibmaplána sámi vuorasolbmuide, ja dáhttu Sámediggeráđđi ovddidit dán ášši dievasčoahkkimii dán áigodagas.
– Mu mielas ráđđi ferte dál ovddidit diekkár ášši dievasčoahkkimii gos mii beassat ságastallat dien.
Vars dáhtošii doaibmaplána dahkkot ja ovddiduvvot dievasčoahkkimii dán áigodagas.
Árja oaivvilda doaibmaplánas galgat čielggaduvvot makkár sadji Sámedikkis galgá dearvvašvuođaeiseválddiid ja eará dearvvašvuođaásahusaid ektui geat sihkkarastet vuorasolbmuid vuoigatvuođaid, dego giella ja kulturvuoigatvuođaid dearvvašvuođasuorggis.
– Min mielas galggašii maid čielga doaibmabijut das maid Sámediggi sáhttá ieš bargat ruđalaččat, doaibmaortnegiid bokte. Mo sáhttá ealáhusain ovdamearkka dihtii boazoealáhusas, meahcástanealáhusas ja guolásteamis eambbo geassit vuorasolbmuid máhttu sisa ja sin mielde iešguđet doaimmaide. Jáhkán doppe leat nu olu geavatkeahtes resurssat geat čohkkájit ruovttuin geat leat leamaš áŋgirat sámeservodagas muhto geat dál eai beasa dego searvat, oaivvilda Vars.
– Livččii hui somá oažžut albma dakkár vuorasolbmuid politihkalaš digaštallama sámedikkis go mun lean sihkar ahte min servodat nanosmuvašii dainna go mii oažžut vuorasolbmuid ruovttuin veahá mielde sámepolitihkkii iešguđet doaimmaide.
Positiiva, muhto ii lohpit
Sámediggeráđđi Henrik Olsen, guđes lea ovddasvástádus earret eará dearvvašvuohta- ja sosiálasuorggi áššiin lohká iežaset leat positiivan ráhkadit sierra Sámediggedieđáhusa dahje doaibmaplána vuorrasiidpolitihka birra:
– Muhto dáinna smávva hálddahusažiin mii mis lea de das šaddá maid sáhka bušeahtas ja resurssain, lohká Olsen.
Olsen ii lohpit ahte dieđáhusa ráhkaduvvo:
– In, muhto árvidan dán birra šaddat sáhkan boahtte dievasčoahkkimis go digaštallat bušeahta ja de beassat oaidnit. Mii áinnas háliidat eanet kapasitehta dearvvašvuođasuorggis, nu mo dákkár dieđáhus gáibidivččii, nu ahte mii gal leat mielas dasa, lohká son.
Ollii vádjolit
Vars lea duđavaš Olsena vástádusain muhto hoahpuha liikká ráđi, johtilit bargagoahtit dáinna.
Sárdnestuolus logai Vars iežas ovddidit dán ášši Bojena Niillasa, Nils Aslak M. Skum ovddas, guhte ollii vádjolit ovdal go beasai gullat maid sámediggeráđđi vástida áššái. Skum lei okta Árjja vuođđudeddjiin.
– Varra dat iešalddis muitala go mis leat olu vuorasolbmot mat leat dan agis jo ahte mii fertet gal hoahpuhit daid doaimmaid vai sii ollejit leat mielde, sii geat leat vásihan ovdamearkka dihtii mo birgejupmi leisoađeáigge, njuolga maŋŋil soađi, mot ealáhusat leat rievdan, lohká Vars Ávvirii.
