Dán jagi giđđaijain Molležis čuojaha Felgen Orkester. Lágideaddji jáhkká joavkku geasuhit olu gussiid Finnmárkkoduoddarii, ja son lohpida maiddái nuppi konseartta.
Goalmmát gearddi lágida Vuolit Mollešjoga duottarstohpu giđđaijaid miessemánu 1.-2. beaivái.
– Felgen Orkester lea háliidan dáppe čuojahit ja das lea dieđusge hirbmat stuora mearkkašupmi midjiide. Lea erenomáš somá go stuora báikkálaš artisttat vulget deike, vuosttaš jagi han dáppe čuojahii Intrigue, lohká lágideaddji ja duottarstobu jođiheaddji Per Edvard Johnsen.
Ealas geasuheaddji
Bearjadaga miessemánu 1. beaivvi lávke Kárášjoga joavku Felgen Orkester duoddara lávdái, dása illuda lágideaddji sakka.
– Sis lea ealaš musihkka ja heive hui bures deike. Dáidá geasuhit olu nuoraid, muhto maiddái mu ahkásaš ollesolbmuid. Mis han maid lea mokta ja háliidat hervvoštallat, boagusta Johnsen.
Per Edvard, dahje Molleš-Piera lohpida gussiide vel nuppi konsearta eahkeda.
– Maŋŋel oaggungilvvu lávvardaga lea maiddái konsearta. Mii leat dál šiehtadallamin eará joavkkuin/artisttain, muhto in dieđe vel goas sáhttit almmuhit dán, čilge son.
Randi Varsi Johnsen ja Per Edvard Johnsen bovdeba maiddái oaggungilvui Molležis. Vuorkágovva: Åsá-Márgget Anti
Eallinmokta lassána
Sámis lea guhkes ja garra dálvi. Molležis dáhtot ávvudit áigemolsašumi, ja bovdejit ge olbmuid giđđaijaid vásihit duoddaris.
– Luondu rievdá, idja lea nu fiinnis go čuvggodišgoahtá. Dáppe duoddaris lea vel čuovgaset go ovdamearkkadihti vuomis. Dáppe lea albmi nu stuoris. Mokta badjána ja olbmos lassána eallinmokta. Giđđaijaid ii háliit olmmoš šat oađđit, lohká Molleš-Piera.
Stuora beroštupmi
Giđđaijat geasuhit olu olbmuid ja juohke jagi galledit sullii 300 olbmo riemuide guovdu duoddara.
– Mii leat dássážii lihkostuvvan bures ja leat hui duhtavačča jus seamma oallugat bohtet dán jagi go ovddit jagiid. Olbmot bohtet miehtá, mearragáttis ja máddin maiddái. Olbmuin lea albma mokta ja dat lea erenomáš somá midjiide, čilge lágideaddji.
Giđđaijat doalut lágiduvvojit goalmmát gearddi miessemánu vuosttaš vahkkoloahpa, doalut geasuhit sullii 300 olbmo jahkásaččat. Vuorkágovva: Inga Marie Guttorm.
Moalkás mátki ja dálki
Duottarstobus leat 50 oađđensaji, eará guossit finadit beaivemohkiid ja muhtimat lávostallet ja teltejit Vuolit Mollešjogas.
– Mis eai leat nu olu idjasajit ja daid gal diŋgojit olbmot dalán go almmuhat artisttaid. Nubbi eará hástalus lea dálki, dan ii stivre olmmoš. Dálki sáhttá vaikke makkár ja dasa fertet beare ráhkkanit, mannan jagi ledje 25 buolašgráda ihkku. Olbmot leat lihkkus čeahpi ráhkkanit dása, čilge Per Edvard Johnsen.
Son muitala maiddái geavahit olu áiggi fievrredit musihkkarusttegiid skohteriin duoddariid, máŋga beaivvi golihit dán bargui. Lágideaddji dattege ii jierásmuva.
– Giđđat ii oro mihkkege veadjemeahttun, dadjá son optimisttalaččat.
