Čuđiid mielde, sihke báikkálaš ja galledeaddji luossabivdit, fitnet unnimusat oktii Finnmárkku luossajogain bivdimin geasset. Gaskaija geassemánu 1. beaivvi álggii dán jagi áigodat, ja maŋŋel olu buriid jagiid, leat maiddái áigodahkii 2018 stuorra vuordámušat.
Steinar Normann Christensenis lea leamaš ovddasvástádus luossajogaide nu guhká go FeFo lea doaibman, muhto ii jáhke dán jagi vel ođđa bivdoolahusa.
– Jus galgá hui álkit čilget, de leat dán jagi stuorraluosat nubbin eanemusat, dan dihte go diibmá godde luosjulggiid nubbin eanemusat, lohká Finnmárkkuopmodaga meahccehálddašeaddji Steinar Normann Christensen preassadieđáhusas.
Olahusat maiddái dán jagi
– Mis leat vuordámušat buorre luossajahkái dál 2018:s. Eat rehkenastte gal makkárge olahusaid dán jagi, dadjá son.
FeFo eaiggáduššá fylkkaássiid bealis 50 luossajoga Finnmárkkus. Eanaš jogat leat lihttoláigohuvvon eaktodáhtolaš ovttastusaide ja servviide. Diimmá jahki šattai buoremus jahkin mii goassege lea leamaš olu FeFo-jogain, ja ledje obbalaš sálašdeaddo- ja lohkoolahusat.
Steinar Normann Christensenis leat dán jagi earenoamáš vuordámušat dihto jogaide.
– Jus galgat geahččat statistihka, de leat várra jogat Várnjárgga lulábealde maidda mus leat earenoamáš vuordámušat. Muhto seammás soitet jogat, main lea leamaš negatiivvalaš treanda, eambbo gelddolaččat, ja joatkašuvvá go dat, lohká son.
Okta dain jogain lea Bissojohka, mas noterejuvvui dušše 1340 kilo 2017:s. Lea sullii bealli maŋemus logi jagi gaskamearálaš sállašiin. Gaskamearálaččat leat goddán 1020 luosa jogas, diibmá godde dušše 377.
2017 hirbmat buorre jahki
FeFo čállá ahte seammás ledje eará jogat main lei buorre áigodat. Riehpovuonjogas lei ovdamearkka dihte okta buoremus jagiin, ja Leavdnjajogas lei fas juohke nubbi luossa maid fidnejedje lei goadjin/duovvi. Ánnejogas šattai sihke deaddo- ja lohkoolahus. Goddojuvvui 15 037 kilo dan jagi.
– Go diehtá ahte lei olu muohta váriin ja maŋŋit giđđa mii dagahii ahte guolásteapmi bođii maŋŋelet johtui olu jogain, lei 2017 hirbmat buorre jahki. Dán jagi jávkkai muohta jođanit, ja olu luossabivdit fitne johkagáttis ja spáikkastedje vuosttaš geardde maŋŋil gaskaija, dadjá Steinar Normann Christensenis.
Diibmá registrerejuvvojedje maiddái olu ruoššaluosat. FeFo hálddašeaddjit mášohuddet oaidnit leat go seamma olu dán jagi vai unnit, ja gozihit dárkilit.
