-Almmuhus-
OĐĐASATFeFo vistti huksejeaddji lea válljejuvvon

FeFo vistti huksejeaddji lea válljejuvvon

-

-

Nord Norsk Bygg AS galgá hukset FeFo ođđa váldokantuvrra Levdnjii. Fitnodat vuittii haddefálaldatgilvvu mas vihtta báikkálaš fitnodaga gilvaledje oažžut huksenbarggu.

FeFo lea dahkan šiehtadusa fitnodagain Nord Norsk Bygg AS hukset ođđa váldokantuvrra Levdnjii. Dat dahkko maŋŋel go ovttajienalaš stivra attii huksenlávdegoddái fápmudusa šiehtadit huksejeddjiin (entreprenevrrain).

– Fitnodat lei buot buohkanassii buoremus áššiid dáfus maid leimmet bidjan vuođđun haddefálaldatgilvui, ja lea bures bušeahta siskkobealde maid leimmet mearridan vistái, dadjá stivrajođiheaddji ja huksenlávdegotti jođiheaddji, Raymond Robertsen.

 

Álggahuvvo geasset

Áigeguovdilis haddefálaldaga rámma lea 26,5 miljovnna ruvnno, ja lea nu gohčoduvvon obbalašhuksen, dárogillii totalentreprise. FeFo bovdii ođđajagemánu álggus buktit haddefálaldaga ođđa váldokantuvrra huksemii Leavnnjas. Guovvamánu 24. beaivvi dievai áigemearri, ja vihtta fitnodaga – buohkat Álttás – oassálaste gilvvus.

Šiehtadallamat ledje njukčamánu gaskamuttus gitta lohppii. FeFo lea geavahan fitnodaga Norconsult olggobeale veahkkin haddefállanproseassas, ja huksen vurdojuvvo álgit geasset. Ođđa visti galgá váldot atnui 2018 čavčča.

– Buot haddefálaldagain lei seamma alla kvalitehtadássi. Lei danne haddi mii šattai mearrideaddjin, dadjá Robertsen.

 

Olles huksenprošeavtta obbalaš rámma oktan earret eará viessodávviriiguin, teknihkalaš rusttegiiguin ja olgoareálaid ráhkademiin lea 38,56 miljovnna ruvnno + lassiárvodivat, čállá FeFo preassadieđáhusas.

-Almmuhus-