Smávvafuođđobivdit Finnmárkkus leat goddán oktiibuot 6 336 rievssaha dan rájes go bivdu álggii čakčamánu 10. beaivvi. Dat lea unnit go okta njealjádasoassi 2016 loguid ektui.
Smávvafuođđobivdit Finnmárkkus leat goddán oktiibuot 6 336 rievssaha dan rájes go bivdu álggii čakčamánu 10. beaivvi. Dat lea unnit go okta njealjádasoassi 2016 loguid ektui.
Rievssatbivddu muddemat leat buktán sávahahtti bohtosiid. Bivdit Finnmárkkus leat njiedjan beliin, seammás go leat báhččon unnit rievssahat go ovdal.
Dán jagi leat báhččon unnit go njealjádasoassi diimmá loguid ektui.
– Logut čájehit bivdodeattu mii lea olu unnit, ja go buohtastahttit bohtosiid, de lea olu unnit oassi rievssathivvodagas báhččon. Lea juste maid mii háliidit go jurddaša boahtte jagi rievssatlogu, lohká meahccehálddašeaddji Christina Bjørkli FeFo preassadieđáhusas.
Godde njealje geardde eambbo diibmá
Rievssatlohkamat, mat čađahuvvojedje dán jagi borgemánus, čájehedje čoahkkevuođa mii lei njeallje rievssaha juohke njealjádaskilomehteris.
Lohkamat mat dahkkojedje 2016:s čájehedje čoahkkevuođa mii lei 50 proseantta alit. Seammás godde njealje geardde eambbo go 2017:s.
Jotket muddemiid
Go FeFo ovttasbargguin báikkálaš servviiguindán čavčča álggahii garraseamos bivdomuddemiid Finnmárkkus mat goassege leat leamaš, mearriduvvui maiddái ahte bivdu galgá evaluerejuvvot.
Dán vahku čađahedje FeFo, NJFF Finnmark (NBGS Finnmárku), Sámi bivdo- ja meahcástansearvi ja Vest-Finnmark fuglehundklubb (Oarje-Finnmárkku loddebeanasearvi) sohppon čuovvolančoahkkima.
Konklušuvdna lei joatkit muddemiid nu go dál, muhto ahte álggahuvvo áigodatearri mii lea 20 rievssaha juohke bivdi nammii. Ággan joatkit ortnegiin lea ahte gárdun lea hui uhca oasáš obbalaš hivvodagas.
– Álkit daddjon báhččojit sullii 90 proseantta rievssahiin bivddu vuosttaš vahkuid, lohká Christina Bjørkli.
Ođđa njuolggádusat boahtte bivdoáigodahkii
FeFo lea dál ráhkkaneamen viiddis gulaskuddamii Finnmárkku smávvafuođđobivddu birra.
Duogáš gulaskuddamii lea ahte FeFo álggahii 2011:s modealla, mas leat muddemat ja mii gáržžida galledeaddji bivdiid vuoigatvuođaid. NJFF váiddii mearrádusa departementii.
Gielda- ja ođasmahttindepartemeanta doalahii mearrádusa, muhto gáibidii ahte FeFo čađaha evaluerema ja ahte stivra dahká ođđa mearrádusa nannen dihte ortnega ovdal go baohtte jagi bivdoáigodat álgá. Dat ođđa njuolggadusat gustojit boahtte jagi čavčča rájes, dieđiha FeFo preassadieđáhusas.