-Almmuhus-
OĐĐASATFeFo juollu­da guokte miljovnna Finn­márkku boazo­doalu heahte­dillái

FeFo juollu­da guokte miljovnna Finn­márkku boazo­doalu heahte­dillái

-

-

FeFo stivra mearridii vuossárgga liigečoahkkimis juolludit guokte miljovnna ruvnno, maid Romssa ja Finnmárkku fylkkamánni galgá geavahit doarjjan Finnmárkku boazodolliide ealáhusa heahtedilis.

– Supmi lea háválašdoarjja mii sirdojuvvo eará ulbmiliin dán jagáš bušeahtas, dadjá Finnmárkkuopmodaga (FeFo) stivrajođiheaddji Máret Guhttor preassadieđáhusastis.

Dárbbašlaš doaibmabijuide maid stáhta ii govčča

Ášši duogážin lea go Finnmárkku boazodoallu lea heahtedilis erenoamáš olu muohttaga dihte, mii mielddisbuktá roasuid nu go elliid gillámuša ja ekonomalaš vahágiid. Guhkit áigge heajos guohtumat ja guhkes johtingeainnut mearragáddái áitet elliid ja dahket liigebargguid ja goluid ealáhussii.

– Doarjja galgá geavahuvvot dárbbašlaš doaibmabijuide maid stáhta doarjjaortnegat eai govčča. Ruhta galgá juolluduvvot ovttasráđis NBR:in Finnmárkku orohagaid/siiddaid bealis ohccojuvvon ulbmiliidda, celkojuvvo FeFo stivra mearrádusas.

-Almmuhus-