Ođđa portála ja áppa galgá álkidit ealgabivdiid ja bivdojođiheddjiid doaimmaid. Dás logat maid makkár rievdadusat leat 2020 ealggabivddus.
Cuoŋománu 3. beaivvi rájes sáhtte ealgabivdit ohcat ealgabivduguovlu inatur.no siiddu bokte.
Finnmárkkuopmodat (FeFo) lea álkidan ealgabivddu, ođđa portála ja áppa galgá álkidit ealgabivdi ja bivdojođiheaddji doaimmaid.
– Šiehtadusa vuolláičállin, faktureren ja máksin, bivdojoavkku rievdadeapmi, ja eriid ja lassielliid juolludeapmi čađahuvvojit portálas. Das gávnnat buot dieđuid maid dárbbašat sihke ovdal ja maŋŋá bivddu. Storviltportalen sisttisdoallá maid StorviltApp, man bokte lea álki dieđihit báhčima ja deattu, geahččat bivdoguovlokárttaid ja telefovnnain hálddašit bivdojoavkku go lea meahcis, lohká FeFo meahcceossodaga jođiheaddji, Einar Asbjørnsen preassadieđáhusastis.
Šluhttet almmolaš vuorbádandoaluid
Koronavirusa geažil fertejit dađibahábut šluhttet vuorbádandoaluid, maid ledje plánen lágidit bearjadaga miessemánu 8. beaivvi.
– Mii buktit dieđuid maŋŋil das, mo vuorbádeami bohtosat almmuhuvvojit, čállá FeFo.
Maŋŋá vuorbádeami oažžu bivdojođiheaddji Storviltportalena sisaloggendieđuid sihke SMS ja e-poastta bokte. Bivdojođiheaddji siiddus galgá bivdojođiheaddji dohkkehit dahje hilgut bivdofálaldaga, ja dasto máksit vuođđohatti. Šiehtadusa dohkkeheapmi ja vuolláičállin registrerejuvvo go vuođđohaddi lea máksojuvvon. – Portálas sáhttá bivdojođiheaddji hálddašit bivdojoavkku ja lasihit ođđa bivdiid sihke ovdal bivddu, ja bivddu áigge. Bivdit fertejit sisabuktit cevzon báhčingeahččaleami duođaštusa Storviltportalenii ovdal go bivdu álgá. Dohkkehuvvon guorranbeatnaga duođaštus galgá maid biddjot portálii. Govvit duođaštumi mobiillain ja vurke portálii, neavvu Asbjørnsen.
Buorre vásáhus iešvihkkemiin
Nu go maŋemuš jagiid, de galget bivdojoavkkut dán ge jagi ieža vihkket ealggaid. – Mis leat hui buorit vásáhusat iešvihkkemiin ja geavaheaddjit orrot maid duđavaččat dainna ortnegiin. Go bivdojoavkkut ieža vihkkejit ealggaideaset, de dat álkida bivddu sihke sidjiide ja midjiide. Min dárkkistanvihkkemat čájehit ahte bivdit dieđihit hui dárkilit, nu ahte dát lea goappašat beliide vuoitun, lohká Asbjørnsen.
Rievdadusat 2020 ealgabivddus
Bivdojoavkkuide sáddejuvvojit dárkkistankoarttat nu mo ovdalge. Rievdadussan dán jagi lea ahte koarttat eai leat nummariiguin merkejuvvon. – Bivdojođiheaddji gávdná juolluduvvon elliid ID bivdojođiheaddji siiddus portálas, ja deavdá ieš fuođđo-ID koarttaide maid lea ožžon. Dát gusto maid lasseelliide, mat juolluduvvojit bivddu áigge, čilge Asbjørnsen. Báhčin ja deattut dieđihuvvojit SMS dahje StorviltApp bokte.
Vuođđohaddi lassielliin sihkkojuvvo
Ovdal lea lasseelliid ovddas leamaš láhkke vuođđohaddi. Dat máksu sihkkojuvvo dán jagi. – Midjiide lea moddii celkojuvvon geavaheddjiid bealis ahte lassielliin ii berreše leat vuođđohaddi. Ođđa portálain háliidat geahččat mo dát doaibmá, ja sávvat seammás ahte min ealgabivdit váldet bures vuostá dán rievdadusa, lasiha Asbjørnsen.
Oktii dušše sáhttá sirdit bivdoguovllu
– Maŋemuš jagiid leat eambbosat sirdán ođđa bivdoguovlluide. Dat mielddisbuktá liigebargguid, ja mii oaidnit dárbbu gáržžidit práksisa dakkár áššiin. Mii áigut hálddašit Finnmárkku ealganáli máddodatplánaid olis, ja láhčit dili nu ahte doarvái ealggat báhččojit. Seammás lea dehálaš muitit ahte ealgašiehtadus iešalddis ii sisttisdoala lohpádusa ahte oažžu sirdit eará bivdoguvlui go dat mii lea šihtton. Gulaskuddamat sirdima, ovttasbivdima ja lasi areálaid ektui, meannuduvvojit dábálaš bargoáiggi siste iige eahkes ja vahkkoloahpaid, loahpaha Asbjørnsen.
